英國女神愛瑪沃森近期由「妙麗BB」變「貝兒公主」，年僅26歲就出演兩個經典角色，入行15年的她感恩之餘亦學識在娛樂圈自訂規則，獨立自強又不為名氣所累，完全唔會惹上「公主病」！對於種種負評，她已學懂堅強去面對！
愛瑪沃森（Emma Watson）對於「90後」來說，一定係「我細細個就聽過佢個名啦」，她早於11歲入行參演《哈利波特》（Harry Potter）系列電影，演出「妙麗」一角陪粉絲成長，完成系列後極力擴闊戲路，今年終於迎來迪士尼真人版《美女與野獸》（Beauty and the Beast）演「貝兒公主」，再創經典。愛瑪受訪時表示夢想成真，但仍不忘成名角色：「《美》片係最完美而且拍得最開心嘅，妙麗與貝兒都有相通地方，而且好好令我記住自己係個演員！」
對於有網民批評貝兒有斯德哥爾摩症候群，一直致力女權工作的愛瑪入戲解畫：「貝兒一直有反抗野獸同佢爭執，有獨立性與思想上嘅自由，而且我認為貝兒係自己決定留喺城堡。野獸大力拍門，佢就拍番轉頭，就係一種反叛，話畀野獸聽自己唔係佢囚犯，唔會同佢一齊食晚餐。」
現實生活中，愛瑪亦與貝兒一樣有原則，且不做名氣的奴隸，她在訪問中自爆之前暫別影壇一年專注人權活動時，翻天覆地的負評令她更加堅強：「我唔係專家，當有人話：『依家愛瑪嚟教你有關女權嘅嘢喇！』就好似逼我埋牆咁，我當時知自己有好長嘅路要行，所以感覺好唔舒服，但我依家已經應付緊。」至於被網民鬧爆影性感相同時宣揚女權勁虛偽，愛瑪就型爆表示：「女權同我對胸有咩關係？女權係有關畀女性自己選擇，唔係單憑既有嘅觀念去攻擊其他女性，女權關於自由、解放與平等！」完美K.O負評者！
愛瑪亦大方剖白自訂娛圈生存規則的原因，自爆近年不與粉絲合照純為保安理由：「對我嚟講，咁係自己揀有番私人生活嘅分別，如果有人影我之後上載到互聯網，兩秒就留低我嘅足迹，佢哋知我着咩與同咩人一齊，我（唔合照）只係唔想交出行蹤畀人跟！」至於鮮有在訪問中提及男友，愛瑪表示不能一邊借男友宣傳，一邊要求記者唔好影私生活，相當均真！
愛瑪雖然為保安而不與粉絲合照，不過她仍出名貼地與親民，不被名氣污染變大牌！她早前與粉絲對談時就自爆曾因《哈利波特》系列電影帶來的名氣而感迷失，一次出席活動後，走入洗手間對鏡自問：「呢個濃妝友到底係邊個？」她亦不時於英國被粉絲捕獲似足平民搭地鐵，早前更為鼓勵閱讀風氣而成立讀書會，身體力行於地鐵站送書與心意卡，晒盡內在美！
出生地：法國巴黎
出生日期：1990年4月15日（26歲）
代表作：《哈利波特》系列電影、《閃閃靚賊》與《美女與野獸》
文：外娛組