籌旗養B買尿片 Tommy：以前借10萬 依家借500！
「MK組合」E-Kids昨日出席慈善活動，發脹三子跳唱時表現吃力，有「樂壇小強」之稱的Tommy（阮民安）更一度停口要兩兄弟唱，三子唱罷即氣喘！剛榮升爸爸的Tommy透露為湊仔搞到只有兩小時休息，曾在澳門賭錢搞到借貴利被挾返港的他，笑言要借錢養B買尿片：「以前借十萬，依家借五百好喇！」
由於成員Kasa（郁禮賢，前名Tim）亦快將為人父，抵死的他暗寸Tommy形象差，笑言會叮囑快將出世的囡囡切忌與Tommy的囝囝交往。Tommy聞言即反擊說：「嘩！辛苦晒喎。」並拉「校長」譚詠麟的乖仔落水說：「去識吓譚詠麟囉，睇吓人哋（譚曉風）識唔識你囉，亂咁噏啫。」
年底開Part 2演唱會
Tommy強調已修心養性及改過自新：「慢慢改變。（做爸爸生性咗？）我都37歲喇，同埋已經係另一階段。」近月參與不少慈善活動的E-Kids被問到是否想洗底？Tommy否認說：「唔需要，希望做好啲，舊事已過。」並鐵定今年12月舉行演唱會Part 2，三子說：「希望係聖誕檔期，暫定四場，依然喺麥花臣場館。」
文、攝：音樂組