無綫花旦王君馨（Grace）與歌手鍾舒漫的新歌MV昨日凌晨於網上曝光，片段中兩女穿上性感裝束，趷Pat兼喪扭腰，意態撩人，短短大半日已有近萬點擊率。Grace透露MV花了六位數字製作，並籌備了一整年，更爆未婚夫先後看了100次之多，還大讚作品又靚又型。
王君馨（Grace）最近踩過界染指歌壇，年前已孖住鍾舒漫（Sherman）錄福音大碟，一嘗當歌手滋味，沒料近日二人再下一城，為曾合唱的歌曲《隱型》製作MV，並於昨日凌晨時分上載YouTube，沒料短短大半日，已吸納了近萬點擊，令二人非常興奮。
於MV中，兩女聯同幾位舞蹈員穿上露腰裝，於鏡頭前落力扭動蛇腰、扭籮及趷Pat，Grace透露MV籌備了一年之久，期間邀得C君和王梓軒等音樂人參與，令她大為高興，又表示MV製作費達6位數：「我哋好落力去搵贊助，最後都要貼少少錢。（未婚夫有冇睇？）有，我『撳住』佢睇，加加埋埋都有成百次，第1、2個初版佢已經話OK，到最終版本佢就讚我哋靚同型，網友評價都正面，所以覺得當日拍咗廿個鐘都值得。」
談到今次MV構思，Grace表示3年前與Sherman到洛杉磯學跳舞，當時已計劃合作拍攝跳舞MV，想不到如今夢想成真。問到快將結婚的她，婚禮籌備如何？Grace哈哈笑說：「好慢咁進展緊，下個月要宣傳無綫新劇《心理追兇》，今個月又要飛去加州同馬來西亞，所以暫時都冇咁嘅時間去搞個婚禮住。」
而Sherman昨日出席慈善活動，提到她與Grace合作的新歌MV剛在網上推出，她希望之後可和對方開音樂會。講到舊愛張致恒（Steven）近日又有新歡，頻頻在網上放閃，昨日就上載了拖住女友手的相片，並寫着：「從今以後只拖你手」，對此Sherman撐舊愛：「佢大膽得（許下承諾）就要負責任。（佢成日作出承諾但又遵守唔到？）又唔能夠睇死人嘅，一個人總有完全改變嘅一吓。」然而其後Steven卻突然刪走了此發文。
文：影視組