谷真眼淚鬆口氣 吳業坤通咗「便秘」
有份演出《迷》劇的吳業坤昨日到婚紗展宣傳自家西裝品牌，講到角色在前晚一集中被田蕊妮迫死，坤坤坦言鬆一口氣：「谷住成年嘅『便秘』終於通咗！一年前接到劇本就知要死同爆喊，諗咗好耐究竟自己做唔做到，但慢慢做又有Feel，做得好唔好觀眾去睇，但自己好開心可以完成嗰場戲。」
講到喊戲時再現眼鏡起霧，他笑言係奇迹：「我呢幾年嘅演藝生涯，除咗攞獎嗰次之後就再冇喊過，嗰下幾有滿足感！同埋證明滴眼藥水係唔會眼鏡起霧，要真喊先得。」坤坤又表示拍劇時要面對人生關口，當時因準備紅館騷，又擔心會有負評，幸好獲阿田開解，並由頭帶到他落尾。