重拾青葱歲月 學生妹唐紫睿掃場執平嘢

身材高挑的「格鬥女」唐紫睿(Hazel)於葵涌區長大及讀書,她在今集東網巨星節目《區區有女神》中「時光倒流」變回學生妹,重遊求學時期必蒲的葵涌廣場,帶大家買平衫及飾物,但最緊要當然是喪食啦!

Fit爆的Hazel原來非常大食,由地下掃到四樓,轉眼已掃清砵仔糕、腸粉、燒賣、碗仔翅及木瓜奶,意猶未盡的她繼續外賣零食,她笑說:「我喺呢度有好多青葱回憶,搞笑、甜蜜、瘀事都有,以前讀書好鍾意嚟買嘢,特別係小食好抵食,呢區平平哋就可以醫飽個肚!好開心依家嚟番,都仲有好多傳統舊式零食!」她又到兒時經常幫襯的小食店幫手賣魚蛋,客串做「魚蛋妹」!

其後Hazel換上Sporty Look到附近運動場挑戰時下年輕人體能,期間笑料百出,比賽結果令你意想不到!想睇女神Hazel「玩轉」葵芳,記得星期三晚黐實東網巨星喇!