黃文意忍夠色狼鵪鶉變戰士

童星出身的無綫娛樂新聞主播黃文意，曾與袁詠儀（靚靚）、吳鎮宇及方中信等影帝、影后合作，當中對靚靚又愛又怕，因對方要求嚴謹！擁36D驕人身材的她又慨嘆發育後經常被博懵，上下同告失守，不甘受辱的她即時高聲呼叫，可惜仍被色狼走甩！

黃文意（Mandy）早前在無綫節目《3日2夜》中穿上噴血三點式浸溫泉，36D「胸器」令人刮目相看，即時被宅男封為「女神」！加入無綫一年的她，原來當初報讀藝員訓練班，落選後反而被點名試鏡，因而踏上主播之路。她自爆入行初期不時撞板，認錯藝人、搞錯節目名之餘，更因小動作多多而成為藝人的模仿對象。

對靚靚又愛又怕

其實Mandy細細個已開始演藝生涯，擁有一雙大眼睛、樣貌可愛的她，3歲便與黃美棋拍廣告，4歲加入影圈與袁詠儀、吳鎮宇、方中信及黃子華等「猛人」合作，眾演員中，以靚靚令她最難忘：「我對佢又愛又怕，佢係一個對工作非常嚴謹嘅人，對我要求都一樣，佢當咗我係佢個女，如果我唔乖或者演得唔好就會話我，佢令我明白到時間嘅重要性！」相對於性格剛強的靚靚，幾位猛男則當Mandy如珠如寶：「有場戲我要仆低喊，鎮宇抱起我，但我喊唔出，佢好有耐性咁陪我入戲；方中信就成日喺片場抱住我，好有愛；子華呢……成日講爛Gag令大家好開心！」

放大圖片

放大圖片

放大圖片

中學遮遮掩掩

Mandy的36D上圍令不少女生羨慕，但亦為她帶來煩惱，中學時即使大熱天時，她也會穿冷衫遮掩，奈何仍被人以「橙」形容其胸形，更不時被性騷擾：「我成日喺地鐵畀人非禮，有伯伯行過專登用手(手爭)撞我個胸，初頭唔敢出聲，但遇多幾次之後，我就敢大聲嗌『邊個揩油！』，當然冇人理。又試過行花市畀人彈Pat，又係大嗌都捉唔到人，啲男人只係好驚咁四散！（唔想大胸？）我不嬲圓潤，都羨慕圈中好多女仔有馬甲線，但我減肥就連個胸都縮水。」

談到感情生活，她自爆入行後曾暗戀別人，可惜被狠狠拒絕。問到性感上陣表白會否有着數？她說：「喺呢行，身材好過我嘅大有人在。」

吳鎮宇的溫暖抱抱，令小小黃文意非常感動。

工作態度嚴謹的袁詠儀，令黃文意非常難忘。

體育堂勁Sweet 同學捉手仔

體藝中學畢業的Mandy，本以為她運動好勁，怎料接受本報突擊測試花式跳繩時竟一仆一碌，明顯手腳唔協調，更因Kick親而幾乎仆低！她尷尬地說：「其實我喺體藝讀藝術嘅，因為我嘅運動細胞係零。上體育堂時，老師唔會訓練我哋，但同學之間會互相學習，我哋教體育勁嘅畫吓蘋果，佢哋就捉住我隻手射籃。（用呢招識男仔？）足球隊有一、兩個係風頭躉，大家都有少少Feel，但對方追追吓又冇追。唔知點解我間中都會有呢個情況，試過有男仔作歌畀我，我好大膽問佢係咪鍾意我，佢竟然答『唔知』，真係激死我！」