奶奶愛駒跑第三 十萬獎金 楊千嬅空手而回

楊千嬅昨日與老公丁子高、囝囝和父母現身沙田馬場，原來是捧奶奶黃淑貞旗下的愛駒「野孩子」出賽，最後勇奪第三名，獲得近十萬元獎金！丁子高接受電話訪問時表示未有因而慶功：「冇乜特別，加上囝囝聽朝要返學，賽後大家返屋企。不過最開心係媽咪，全家都去馬場，孫又喺度仲開心。囝囝都唔知發生乜事，只係見到啲動物跑來跑去。」問到母親會否再養多隻馬，他說：「我聽佢講，養馬好多煩嘢。（你買隻馬養？）我冇呢方面興趣，對賭博都冇興趣，咁耐以嚟都係投注『野孩子』一兩次，今次都冇買。」