林奕匡又攬又孭 冧暈Fans
歌手林奕匡（Phil）昨日為新碟舉行簽唱會，大會安排Fans上台與Phil互動，模仿電影中的經典畫面，與Fans大玩從後擁抱、孭起對方及拗腰扮咀，令三位女Fans暈晒大浪。活動後Phil接受訪問，表示新碟在演唱會前推出，所以當時未有時間宣傳，平時一年才做兩、三個大Project，但想不到一個2月已完成了新碟及演唱會。
問到下一步是否籌備婚禮，他坦言首先要求婚：「好多人求婚都好有心思，做壞晒個市，搞到我都要諗啲心思嘢求婚，始終同女朋友經歷咗九年。（寫歌送畀女友？）有啦，新歌《難得一遇》就係送畀佢，女友聽咗好感動，因為首歌係講上天要作弄你，我哋就偏要一齊。最記得當年自己仲喺低谷，連前途都未知點時，佢有日同我講『出埋張碟先，如果唔得就陪我返加拿大讀書，一齊捱過。』」他又稱將會外遊充電，想到日本看櫻花，亦想去熱帶地方，但現時還未決定。
