田蕊妮脫軌失常 隨時睇心理醫生
無綫藝人田蕊妮（阿田）早前拍攝新劇，情緒受角色帶動，難以抽離角色的她坦言曾演到「冇力」，打趣提醒老公杜汶澤如她有需要時，記得帶她去睇心理醫生。阿澤則趁老婆有空檔，帶對方滑雪散心，並帶新相機為阿田留倩影，成功放閃！
視后阿田主演的新劇《迷》正在熱播，她坦言今次是入行以來遇上最複雜的角色，拍攝時曾不懂如何與現實生活「接軌」﹕「我演女強人，鑽牛角尖嗰類，同我本身性格南轅北轍。有次打風有假放，我去咗朋友屋企開派對，但自己坐喺度成晚冇出聲，表現嚇親人，我發覺自己唔識得『放假』。」
鄭嘉穎窩心送小食
拍攝期間，阿田完全受角色情緒牽引，老公阿澤卻正在籌拍新片，「孤立無援」的她笑說：「我哋有溝通，佢（杜汶澤）都關心我嘅。有日佢見我化妝返工就同我講：『都幾在狀態吓喎……』我知佢話我太投入，我就回佢一句：『到時（有情緒病）記得帶我睇醫生就得嘞。』我好記得最嚴重嗰時只要身邊有人講句嘢，我會即刻問助手佢係咪話緊我。」
猶幸拍檔鄭嘉穎在旁支持，令阿田感動：「以前嘅嘉穎鍾意收埋自己，依家佢可以用暖男嚟形容，佢會喺旁邊精神上支持，又會買飲品小食氹我，仲要唔係直接畀我，係交畀我助手話：『阿田今日辛苦嘞，收工幫我畀佢啦。』真係好窩心。」
老公下盤穩唔識跌
稍後將投入重頭作《誇世代》拍攝的阿田，近日被阿澤帶着「出走」，飛往北海道滑雪。阿澤更被老婆「爬頭」，早一步學懂滑雪，阿澤受訪時笑謂：「見佢識咗，我第二日即刻請個澳洲教練上堂，教練話可能我學咗空手道咁多年，下盤太穩，因學滑雪第一步，係要學識跌，我依家都得咗。（買新相機畀老婆鬧？）咩呀？我諗住拍完套戲咁辛苦，買隻手錶獎勵自己，依家唔買手錶改買相機之嘛。」
文：影視組
攝：司徒國榮
服裝：Zadig & Voltaire