方力申醋爆：巴閉啦歐鎧淳！

小方和淳淳BB昨日到香港浸會大學出席講座，結束時，大批學生排隊與二人合照。小方表示與學生分享運動員精神：「香港青年聯會邀請，冇壓力，同歐鎧淳又好熟。」他坦言最想與同學談論做人態度，問到有否遇過態度差的演員？他稱：「好多，遲大到、對工作人員呼呼喝喝，拍唔到佢就唔交戲，直頭可能唔喺你面前，叫副導演幫佢講對白，咩人都有。」

讚小方識搞氣氛

淳淳BB指首次與師兄一齊講運動員生涯，覺得很特別：「佢入行咁耐，識點樣帶動氣氛，所有嘢好過我好多。有時我自己出嚟好悶，會悶親自己。（學生當你係女神！）你諗多咗啫，佢哋純粹影相留念。」獲提名香港傑出運動員的淳淳BB坦言不知有否信心，但希望更多人認識運動員，她睇好桌球手吳安儀得獎。

歐鎧淳深受大學生歡迎。	淳淳BB透露與男友於情人節撐枱腳。	小方與鄧麗欣已甩拖，冇記者問他感情生活。

被寸講嘢似港女

問到如何跟男朋友慶祝？她笑言未得獎。身旁的小方突然醋爆笑言：「依家啲娛樂記者唔問我o架喇！巴閉啦歐鎧淳！我做運動員嗰陣冇拍拖o架。（大把女追你啦！）冇！」淳淳BB即偷笑指要準備食花生。

之後小方自爆曾與隊友拍拖，試過在水底向對方單眼及深情互望，但笑言不是自己的冧女絕招。另外，淳淳BB透露情人節與男朋友吃飯，收到乾花做禮物，打算白色情人節才回禮，小方笑說：「你講嘢唔好咁港女啦！ 」

文：音樂組