麥芷誼推500萬飯局轉戰幕後
藝人麥芷誼（Koyi）2015年全裸演出處女電影《同班同學》，惜其後發展麻麻，要靠兼職售貨員維生。最近她更轉戰幕後，為電影任服裝助理，雖搵食艱難，但她堅拒走捷徑，試過推掉五百萬飯局！
演員需要七分努力、三分運氣，Koyi初出道就擔任電影女主角，而她亦豁出去，全裸上陣，可惜後勁不繼，她說：「電影上映完做番Part time工作，喺朋友開嘅時裝品牌做Sales，幫網台做節目主持，直至最近幫一套電影做服裝助理。但第一日返工就搵唔到對耳環，嚇死我，因為要連戲用，好彩最後搵番。」
自此她明白到「幕後唔易做」：「做幕前要好注意自己，因為始終係表演，會比較自我，但幕後工作人員好唔同，基本上要犧牲自我，要將注意力、精神擺喺幕前演員度。我覺得好偉大，幕後工作人員最早開工，最晏收工，試過有一日凌晨五點半去到現場，做到夜晚十點幾，即係十八個鐘，基本上係筋疲力盡，好值得尊重！」
演員收入難穩定
Koyi亦試過因工作關係與父母爭吵：「依家我哋唔講（家用），我好任性，唔識同屋企人溝通，但佢哋見到我好唔開心，始終會企喺我身邊支持我。嘈交時當然有叫過我轉行，因為佢哋會擔心，收入又唔穩定，拍完一套戲，又唔知幾時有下套，佢哋叫我做番Sales，我有同佢哋傾過，我對電影真係好有熱誠，想後生放膽試一試，佢哋都尊重我嘅。」她又認為錢不是最重要，有時對家人作出適度關心，反而更窩心。
拍裸露戲惹問價
訪問中，Koyi再三強調「錢」的排名很低，她更試過推掉五百萬「工作」：「拍完裸露戲有人問價，透過社交網站問我有冇興趣接內地工作，我以為係電影定電視劇，叫佢add我通訊軟件，點知佢一嚟就問我有冇興趣接飯局。我即刻表明自己冇興趣，但佢都苦纏咗我成個月，我一直冇應，佢就不停提升個價錢，最後講個價係五百萬！我真係估唔到有人畀五百萬同我食飯，可唔可以畀五百萬我拍套戲呀？幾搞笑，叫我為錢做冇乜興趣嘅嘢，我真係冇興趣。我諗我會合埋眼囉，哈哈，頂唔順太肥膩！」
文：專案組
攝：吳文聰