安喜兒重手一巴過林作被女人摑：好小事
林作被讀者爆料指日前在酒吧疑溝藝人陳達仁旗下影壇女新人「翻版陳嘉寶」安喜兒失敗，復遭女方當眾掌摑，記者昨日致電林作問及被兜巴星一事，他解釋原來當日是試戲：「電影公司老闆程芷渝都在場，佢想試吓啲戲，咪叫安喜兒摑我一巴。（你被摑有冇嬲？）點會嬲呀？明知係假。（塊面好痛？）OK啦，不過我未試過畀女人打，其實我踢開波，呢啲（被摑）好小事。」
至於安喜兒亦謂當日傾完劇本簽完合約後，程芷渝叫他們試戲，並謂摑林作前內心很掙扎：「驚太細力搞到效果冇咁好，但唔想打佢幾次，所以諗住一下大力啲就算，當時林作喺我耳邊講：『陣間你打我嗰吓唔好咁大力喎』，但我下一秒就要打落去，打完嗰吓都心諗，死啦，咁大力咁響嘅，驚佢會嬲，但佢冇嬲，係有啲驚訝咁大力，我都有不斷同佢道歉。」
在場的程芷渝謂事後有教番安喜兒怎樣借位摑人。陳達仁則指是即興叫林作做調戲安喜兒的老闆角色，曾擔心林作嬲，幸好對方很有風度。