陳嘉桓負變正做番Happy Girl
擁有43吋長腿的陳嘉桓（Rose），憑着「腰果眼」加甜美笑容，入行不久已被封為「宅男女神」。早前她為「東網Baby春日限定版」拍攝泳衣照，自爆2016年打破了個人工作紀錄，拍了十多部內地影視作品，財源滾滾，雞年更有望「上車」置業！回顧入行多年的起起跌跌，Rose直言很感激冼國林與曾志偉，當年更因志偉的一句話，令她的心情由低谷跳回地面，做番「Happy Rose」！
陳嘉桓14歲入行做模特兒，其後加入國藝公司，不經不覺已10年。回顧入行以來的起起跌跌，Rose直言很開心獲得不少前輩疼錫，令她遇上困難時可以堅強走下去：「記得有一段時間，我因為一啲負面新聞而好唔開心，因為好多根本係將事實扭曲咗。嗰時唔開心到將所有社交平台刪晒，完全封鎖自己，唔想接觸外界，感覺自己好孤獨、好灰！好彩當時師傅冼國林一直開解我，每當我想放棄時，佢都鼓勵我堅持同面對，令我學懂堅強。」
屈埋徒添負能量
除了冼國林外，「獎門人」曾志偉亦是Rose低潮時的一位「救星」，對方的一句話，更令她將不開心轉回「正能量Mode」，她說：「我同志偉哥為同一個首飾品牌代言，所以時不時都會見到佢，佢曾經喺我最唔開心嘅時候講咗一句說話，令我由低俗跳番出嚟，嗰句說話就係叫我要『敞開心扉』，佢話人要開心，要首先將個心打開，否則自己屈屈埋埋，負能量極重，又點可以將歡樂帶畀大家？做幕前就係要將開心、正能量帶畀觀眾，咁先叫有意義！我覺得佢講得好啱，點醒咗我。呢位前輩真係娛樂圈、社會上的一個典範，好值得大家去尊敬同向佢學習！」
新一年目標買樓
2016年可算是陳嘉桓的「幸運年」，破了個人紀錄接了十多套影視作品，當中包括多部內地網絡電影及香港電影《我要發達》、《脫皮爸爸》等，她說：「2016年喺內地拍咗好多嘢，2017年會陸續推出，我都好期待，最開心係可以試到唔同類型嘅角色，唔只局限於動作戲。」
工作上累積經驗自然可喜，而多工作令荷包腫脹更是可賀！去搵到盤滿缽滿的Rose，希望雞年能夠一圓業主夢：「2016年係馬騮本命年，慶幸工作非常唔錯，希望雞年可以更加好，因為好似話雞年旺猴，新一年希望可以繼續試唔同嘅嘢，亦希望買樓做業主。」
唔只打得！演技大爆發
現年24歲的陳嘉桓，14歲入行做模特兒，其後加入冼國林旗下的經理人公司，並獲冼國林收為徒弟，經過師傅悉心栽培及3年艱苦訓練下，在武術方面大有進步，更曾獲香港公開武術錦標賽銀牌！她於17歲時參加第二輯《美女廚房》，因外形亮麗及笑容甜美而有「嫩口鍾嘉欣」之稱，更被封為「宅男女神」 ，多年來拍過不少電影，包括《葉問前傳》、《笑功震武林》、《男人唔可以窮》、《販賣．愛》、《辣警霸王花》及《我要發達》等，其中於《販賣．愛》中飾演援交少女，破格演技贏得不少讚賞。
Profile
姓名：陳嘉桓（Rose）
身高：5呎9吋
三圍：32、25、36
出生日期：92年11月8日
泳衣提供：Roxy
https://goo.gl/6dFQYP
文：影視組
攝：吳文聰