文詠珊黑面神上身怒撇男友

藝人文詠珊（JM）與金融才俊男友吳啟楠（Carl）拍拖以來愛得甜蜜，經常出雙入對，雖然JM近年頻頻在內地工作搵人仔，但男友亦不時「人肉速遞」探班，兩人感情穩定。早前多次傳出JM與Carl有結婚打算，好事近的兩人最近雙雙搬入由男方豪擲2,500萬港元購入打算作為新婚的愛巢、位於大埔比華利山的別墅豪宅。

翹埋雙手冇晒符

近月在內地忙於拍攝新劇的JM日前難得返港，她亦爭取時間拍拖。當日下午3時許，她與母親乘坐七人車離開大埔愛巢，兩人先到大埔的商場為愛巢選購家居用品，JM其後送母親回梨木樹寓所後就直駛尖沙咀會合一名女同事，兩人往咖啡店洽談工作後，JM再轉往附近的火鍋店與數名男女友人醫肚，未幾男友Carl亦到場會合。

放大圖片	JM與男友Carl前後腳步出火鍋店，全程黑面神上身。	JM同男友企到離行離列，Carl亦冇晒符翹埋雙手。

逗留約兩小時後，一行人齊齊離開，但JM與男友似乎意見不合有嗌霎。見兩人前後腳步出門口，JM全程面燶燶毫無笑容，男友亦一臉無奈，只好翹埋雙手站於女友身後。甫見七人車駛近，JM即與兩名友人上車，男友見狀亦緊隨其後急急腳跟上車。一行人轉場往尖東的大廈內暢飲，但JM落車時依然怒氣未消，即使男友陪在身旁卻依然嘴扁扁。聚會至中途時，JM更突然撇下男友獨自離場，怒氣沖沖地步出大廈，更鼓埋泡腮，頭耷耷急步上車返回大埔愛巢！

JM同Carl雖然一齊行，但依然未下火，仲擰歪面冇傾偈。

JM近月忙於在內地工作，難得返港見男友卻嗌交收場。

文、攝：追蹤組