牛雜妹戲院偷情遭「厚多士」篤背脊
「牛雜妹」李美琪自小在元朗區長大，Monnie坦言情竇初開時曾到元朗戲院與男朋友「偷情」，滿以為可以瞞天過海呃晒全世界，怎料竟被「厚多士」（好多事）發現，翌日更向Monnie爸爸告狀，令這段戀情曝光！
放學放假落舖幫手
李美琪（Monnie）兩年前參選港姐而入行，當年因出身草根及寫下千字文表明加入娛圈決心，感動千萬網民，大讚她為人夠真夠貼地。Monnie爸爸在元朗賣牛雜起家，雖然Monnie不在此區讀書居住，但仍與元朗區有密切關係。她說：「我細個喺屯門同天水圍住，但因為爸爸喺元朗開舖頭，所以每逢放假同放學，我都會去舖頭幫手，久而久之我對元朗都好熟，依家仲搬埋嚟元朗住，所以元朗對我嚟講係一個充滿回憶嘅地方。」向來與家人感情深厚的Monnie，不時舉家到區內的酒樓歎「一盅兩件」，享受天倫之樂。
唔出旺角嫌睇戲貴
講起元朗，大家必然想起甜品及美食，但Monnie指讀書時期經常「蒲」的地方是元朗戲院，皆因在此睇戲平過市區。Monnie更自爆是「偷情」的好地方，她說：「以前學生時期零用錢唔多，但又好鍾意睇戲，喺銅鑼灣、旺角睇戲一定貴過元朗，雖然呢度設施環境係比較殘舊少少，但價錢平啲就冇乜所謂啦。」
Monnie回憶當時情竇初開，但因未有向家人公告戀情，故與男朋友在戲院「偷情」。她說：「嗰陣學生拍拖都冇乜嘢好做，最豐富嘅節目就係去睇戲。當時因為屋企人未知，所以嗰陣就約咗男朋友嚟睇戲，以為冇人知道。點知第二日有個客人去舖頭食麵同我老竇講：『我見到你個女拖住個男仔喺戲院出嚟！』所以就畀我屋企人知道我拍拖，但之後戀情亦都不了了之，所以呢個戲院對我嚟講印象係好深刻。」
應有盡有不停講價
正所謂慳得一蚊得一蚊，除了睇戲夠慳外，買衫都要夠平！Monnie坦言平時在元朗行街首選必定是喜利商場，皆因入面應有盡有，衫褲鞋襪乜都有。Monnie坦言當年讀書時擔任幹事，預算經費不多，故要到該商場格價：「讀書要拎幾百蚊買物資，為咗要多元化又要夠多，所以都會嚟呢個商場，係咁同人講價，有時佢哋都會因為我買得多所以平啲畀我。因為呢度都係小店，相對地有人情味多啲，款式又夠多。」
街坊親切人情味濃
Monnie大讚元朗區人情味濃，故日後出嫁都希望繼續住在此處：「始終呢度算係成長嘅地方，呢度好有人情味，有好多街坊會過嚟同我打招呼，又會同我講聲加油努力，所以依家都要努力儲錢，等第時可以買到樓。」
文：林倩怡
攝：吳文聰