戴水晶催桃花 張可義備戰情人節擸毛巾減肥

農曆新年剛過去，又到西方情人節，相信女士們正為身上的贅肉而煩惱，模特兒張可義（Emily）經常要在鏡頭前保持弗爆身形，故對減肥甚有心得，並即席示範「毛巾操」，教大家輕鬆擊退手臂Bye Bye肉及虎背熊腰，她說：「只要喺屋企準備一條毛巾再配合動作，可以減到討厭嘅Bye Bye肉，仲收細臀部同腰部，啱晒一班冇時間做gym嘅女士。」

愛靚亦愛命

瘦身是女人的終生事業，自言是肥體質的Emily亦深有同感，更透露為減肥去到盡，曾試極端的節食方法：「最誇張係試過一日食一個蘋果，差唔多去到絕食嘅狀態，雖然減得好快，但一食嘢就極速反彈，唔健康亦減到身形唔靚。」減到一身病痛的Emily揚言「愛靚亦愛命」，改以持之以恆做運動取代節食，並練出一身完美的線條。

生日等人約

提到情人節將至，Dry爆的Emily大呻沒人約，要戴水晶催旺桃花運：「暫時未收到邀約，希望大家積極啲約我，因為情人節之後兩日係我生日，都想有人陪我過節兼慶生。（想點樣過情人節？）我唔需要出去食情人節大餐，反而希望同另一半喺屋企一齊煮心形牛扒，咁樣已經好浪漫又有心思！」

用一條毛巾便可減肥，張可義Keep得一身靚線條。	張可義認為毛巾操最啱冇時間做gym的女生。	張可義示範提腿動作收身。

文：專案組

攝：吳文聰

場地：Ultimate Training Center