紅館騷Ready起肌柏豪狂操「嗰度」大舊咗！

周柏豪將於4月底再踏紅館開騷，昨日記者會上坦言已操定肌，隨時Ready大騷成果，又透露身穿的西裝不合身，因操肌操到身體某部位「大舊咗」！

歌手周柏豪將於4月28至30日假紅館舉行入行十周年的《One Step Closer Pakho Live 2017》演唱會，門票於下周一發售。柏豪昨日出席記者會造勢，獲多位圈中好友如蔡卓妍（阿Sa）、鄭伊健、張智霖、楊千嬅與黃翠如等拍片祝賀，其中阿Sa搞笑地追歌債：「佢入咗行十年，一首歌都冇寫畀我！」

受訪時被問到個唱可會騷肌？柏豪笑說：「點都騷到嘅！就算呃你話唔騷，啲衫最後都會騷到，所以一定會操定！今日套西裝係兩個星期前試，依家都有啲唔啱着，我大舊咗。（邊度大舊咗？）除咗『嗰度』大舊咗，我背脊都大舊咗……我講手臂！」提到2014年的紅館騷秘密苦練打後空翻，他透露今次會練新才藝：「冇上次咁危險，呢樣係我由細到大都好鍾意但冇接觸過。（樂器？）類似啦！」個唱優先訂票已火速爆滿，但柏豪透露未能再加場：「想加但後面冇期，原本想問後面嘅活動攞期，但佢反而問番我攞。（Part 2？）希望！做好呢三場先。」又指有預留三場門票給新婚太太Stephanie。