神奇志偉單挑女賭神你點開盤？

有人就話志偉住正間風水屋財源滾滾，有口痕友直情同我Nuts哥講：「佢之前輸埋輸埋冇人知啫！」、「佢本身大把水，唔志在啦！」都話依家好多人憎人富貴厭人貧o架啦！志偉係有米，但我Nuts哥就唔信1,600萬對佢嚟講係散銀囉！計我話，個個咁多理論馬後炮，一時又話志偉行運，一時又話志偉轉數快、數口勁，不如叫志偉做過江龍，過大海同近排傳聞贏過億嘅神秘女賭神賭番鋪，嚟番場真正嘅賭城風雲，等大家睇吓女賭神羅庚勁，定係志偉神算醒！

閱女無數！晒心口都嘥氣！

澳門賭場近排出現一個神秘女賭神日日玩百家樂，堅係日日易賞錢，輕輕鬆鬆鄧梓峰就贏咗過億！傳聞話呢個女賭神出手又狠又準又忍得，一唔啱心水就叫荷官飛牌飛到頭都暈，睇準先出手落注！仲話賭場用盡科技研究呢位女賭神有冇出蠱惑，但睇極都冇漏洞，仲拖低某賭場嘅業績，令唔少賭場聞風喪膽！查實一鋪買300萬，手風旺起嚟贏過億都唔難！尤其對於一個職業賭徒嚟講，點玩、使幾錢玩、玩啲咩，全部都係計數，冇得靠運氣！

雖然未知呢位女賭神何方神聖，早排仲流傳佢嘅「真身」相片，身材同賭術一樣「胸狠」，不過好快就話另有其人！如果搵志偉做荷官，真係有得諗喎！佢行出嚟個樣咁卡通已經夠搞笑，講氣場一定勁過女賭神！就算女賭神大胸又點？志偉閱女無數，大胸、平胸、有線、冇線都冇有怕，你心口拉低幾寸玩轉移視線、換牌換幾廿次又點？唔驚！志偉出名口臭，把聲又夠刺耳，你一換牌我又寸吓你窒到應，得閒又搞吓爛Gag，獎門人上身同你講句：「Super！」唔笑死都嚇親！志偉有咁多紅顏知己，真係貪佢靚仔咩？就係因為佢口技強勁條脷識轉彎！不費吹灰之力玩口技用吓冧功，剛柔並重，九淺一深，女賭神仲唔投降？睇怕個女賭神全程唔係冧到震，就係笑到噴飯、牌都揸唔穩，都好難專心落注嘛？分分鐘開心到係咁易玩兩鋪就收手皆大歡喜，直情同志偉摸吓酒杯底交流吓馬經仲實際喎！

自嘲零包袱 抵你發達！

唔好睇志偉身高五呎多少少，查實佢做武師入行，真係估你唔到，做做吓變埋男主角兼堅有戲做埋影帝！志偉短小但堅精悍，仔女成材，老婆都有兩個，都唔係個個可以做到，志偉講過：「諷刺自己，係人生最好嘅潤滑劑。」好老實，可以唔怕瘀連自己都笑埋一份，唔係話厚面皮咁片面，即係做人拎得起放得低，咁先至開心！所以志偉畀人問贏咁多錢，佢都只係話當係數字遊戲一場，覺得開心同感恩，善事繼續做，仲話唔信咩風水屋，存好心做好事，行運自然風水好咁話！呢句真係堅o架，個人有Heart有正能量，做乜都零舍順利，呢個先至係真正嘅發達秘笈！