周秀娜病住捧場 阿Sa頭暈早走逼小巴
韓國天團Big Bang開騷，吸引一眾星級粉絲捧場，藝人周秀娜、蔡卓妍（阿Sa）、馬天佑及組合Super Girls成員Heidi（李靜儀）等乘搭大會專車入場，不用與其他粉絲逼。戴口罩現身的周秀娜自爆抱恙中，但今次是成員T.O.P入伍前最後一次合體開騷，故她說：「病住都要嚟睇！」而同樣抱恙的阿Sa昨晚於社交網留言表示睇到中途不適，要提早排隊搭小巴離場：「睇到暈暈哋。」
此外，楊千嬅孖住老公丁子高現身，她笑指囝囝曾「扭計」要求同行，但被她拒絕：「我同佢講話你太細，大個啲先！佢都識唱Big Bang啲歌，好似《Loser》同《Bang Bang Bang》。」自爆是Big Bang粉絲的狄波拉亦與老公鬍鬚Kong恩愛現身，並特意帶同四位來自東華三院的小朋友睇騷，又親自安排小朋友排排坐。而同樣有捧場的王君馨，把握機會到大型展示板與Big Bang「合照」。