傅嘉莉牛一 何廣沛尷尬焗咀
無綫藝員黎耀祥、傅嘉莉、何廣沛、單立文、姚嘉妮及賴慰玲等，昨日在馬鞍山為賀歲劇《財神駕到》宣傳。傅嘉莉昨日32歲生日，大會送上蛋糕慶祝，劇中與她飾演一對的何廣沛被眾人起哄吻賀壽星女。他先用手掌隔着作狀錫了一下，但眾人卻不收貨，最後他半推半就下錫了傅嘉莉面頰一下，一臉尷尬。受訪時，傅嘉莉要求何廣沛唱生日歌，他即時獻唱，講到在台上尷尬一吻，何廣沛笑說：「見到靚女，緊張。」
傅嘉莉表示會與家人食飯慶祝，希望新一年不會再有負面新聞，不過昨日有報道指她背着傳緋聞的已婚富豪搭上另一富豪，她回應說：「TVB可以請佢返嚟做編劇，對我完全冇影響，唔會為作出嚟嘅新聞唔開心，完全冇呢個人。」
黎耀祥減產 北上搵人仔
至於黎耀祥最近被拍得與《巾幗梟雄》班底李添勝、鄧萃雯、張華標食飯，問到是否打算再合作？他說：「冇啦，其實添哥都年紀大，在公在私都希望佢生活過得舒適。（游說鄧萃雯回巢拍劇？）其實公司一路都有搵佢，但佢都要睇啱題材、劇本先拍，我哋嘅方向都係咁。（你都減產？）好出奇咩，好似以前咁一年拍五、六套頂唔順。」
黎耀祥預計劇集產量減半，年頭將做音樂劇，接着拍王心慰監製的劇集，預計年尾會到內地拍劇，希望有新鮮感，他說：「依家年紀大，唔可以好似以前咁唔瞓覺，拍咗咁多套劇，工作希望可以分散啲，有啲唔同變化、唔同層面，同啲唔同演員、導演合作，等觀眾有新鮮感。（天價返內地拍劇？）係合理價，大家傾。」
文：影視組