祖兒格格爭窿捐畀4仔責

天后容祖兒近日頻撲來回中港兩地，在港出席完音樂頒獎禮後又要趕回內地工作，她不禁在網上大呻Schedule超忙碌：「由澳門返香港去海南島再去北京，再返香港再去長沙再去湛江。」據知她如此忙碌是因為參加了湖南衞視的綜藝節目《快樂大本營》。前日她在長沙錄製節目，同場有謝霆鋒、內地女星唐嫣、周筆暢等人，眾人要穿清裝玩遊戲，祖兒還化身「祖兒格格」。

「扯親條頸差啲歪」

祖兒玩遊戲時十分落力，她在電話表示遊戲十分刺激，大爆玩到幾乎窒息：「玩遊戲扯親條頸，畀四個男人『責』咗喺我身上，而我唔知嗰四個男人係邊個！仲差啲抖唔到氣！」祖兒解釋遊戲的玩法：「好似爭櫈仔咁，爭個窿然後捐出去，嗌到嗰個號碼就大家一齊捐出去，我本身捐咗半個頭出去，點知畀四個男人『搶韁』，勒到我條頸差啲歪咗！」據知她參與的部分將在大年初一播放。

祖兒格格嚟喇！	霆鋒（前排左）與一眾男藝人玩遊戲，邊個「責」親祖兒？	祖兒（右）與謝霆鋒（左）同上節目玩遊戲。

個唱內部認購爆晒

另外，3月底祖兒舉行十場演唱會，雖然門票仍未作優先訂票，但內部訂購已經爆滿，反應熱烈，然而有網民踢爆其演唱會海報涉嫌抄襲，對此祖兒回應：「創作嘅嘢，我都係八個字啦：『如有雷同實屬巧合』。」她力撐海報創作總監林海峰：「我唔覺得佢係抄，Double Exposure Portraits喺世界上已經出現咗好耐，大家試吓上網查，有成千上萬雷同結果。佢為我嘅設計配合到我演唱會主題，又靚，我就好滿意啦，好多謝佢！」她又大讚海報花開富貴好意頭：「個騷未公開發售已經內部認購爆晒，好開心！」

文：音樂組