艾美琦學做江湖兒女
o靚模艾美琦（Amy）早前以火辣女郎造型為內地美髮用品拍廣告，她表示天氣雖冷，但多得客戶的熱情支持：「聖誕節喺工作中度過，感覺雖然好Lonely，但多得客戶支持，工作排到密密麻麻。除咗四出登台表演外，我仲接咗湖北一部關於江湖恩怨嘅愛情電影，邀請我嘅導演係上次夏蕙姨（黃夏蕙）帶我去湖北拍戲時嘅同一個導演，我知道導演指定我參與今次演出時簡直唔敢相信！除咗努力揣摩角色同埋上特訓班學戲外，我仲參考咗同類型電影做資料搜集，希望演到一個入型入格嘅江湖兒女。當然仲唔少得每日練舞、跑步減肥，因為冬天一到，好多人都容易鬆懈，而我就算冬天都堅持保持身形健美！」
