林作明讚暗踩：我讀牛津叻過佢

「十優港姐」麥明詩（Louisa）與大律師林作雖然講明關係是「朋友」，但又經常見到兩人有影皆雙，關係撲朔迷離！一向不乏追求者的Louisa，被指近日有「新歡」劍橋同學兼藥房少東Thomas Chong管接管送，因而傳緋聞。其實Thomas早於Louisa主持的《星星探親團》中亮相，女方更讚賞Thomas是「社交界萬能拍檔」，大家是好兄弟，感情甚深！

覺得緋聞得啖笑

林作回覆本報時就開腔對情敵明讚暗踩！他先被問到自己與Louisa目前關係，表示不欲多講，但狂讚Thomas係好男仔：「我唔會comment我同Louisa嘅關係，但好樂意講Thomas。我要讚爆佢，我好鍾意佢。佢好好仔！（好仔得過你？）佢同Lousia係識咗好多年嘅好朋友，我識Louisa後再識佢。佢平日踢波都會搵我，佢溫柔、體貼、靚仔同叻！」當問到林作自覺有何優勝之處？他則自言學歷勝人一籌：「我唯一叻過佢就係讀牛津，佢其他一切條件都好好。（擔心Louisa被Thomas追走？）唔係擔心唔擔心嘅問題，係佢哋咁老朋友先嚟講，得啖笑！」

太熟冇發展機會

至於Louisa其後受訪時即向Thomas「派檸檬」：「冇接送出入呀，嗰次我哋一班朋友喺佐敦食完嘢，我住圓方，佢有揸車就兜一兜我返屋企，佢都有車埋其他兩個朋友。（有發展機會？）Thomas係我識咗好耐嘅朋友，佢本身有好多追求者，你哋唔好搞到影響咗佢啲姻緣啦！我哋識咗太耐，因了解而不能開始。」

文：影視組