許冠文講國語得香港人聽得明

藝人許冠文（Michael）昨晚出席其主演的電影首映禮，笑言自己在該台灣片中說國語，但只有香港人聽得懂。問他早前以大熱姿態失落金馬影帝有何感受？他說：「我本身信心唔大，但好鍾意個劇本，反而覺得變大熱門好突然，仲熱到百分之九十九，宣布前五分鐘，司儀陶子（陶晶瑩）話我係最大熱門，問我有咩感想，我就話通常熱門都會倒灶，好似英國脫歐，特朗普又選到，不過我老婆信晒，仲提我宣布時起身要扣鈕。其實我冇咩好大失落，電影獎係在乎評審感受，能夠喺500部選到5部，而自己有份提名已算係咁。」