非常外母撐女婿上床記得收手機！
開心嫁女係喜事，無端端成親變尋親，突然有人走出嚟問點解「新娘不是我」，自己先係大婆正印！做咗外母只係一星期嘅陳曼娜，諗住個女Joie嫁個好老公乜都安樂晒，點知女婿Dicky被爆婚後同舊愛金若希當街拉扯！金小姐尋日現身說法話被Dicky呃，仲話自己有感情潔癖，不齒做小三，話Joie先至係真正嘅小三！最爆嘅係，金小姐連「閉經」五十日都爆埋出嚟，一句：「五十天沒有來大姨媽了，應該是懷孕了！」吓？咁大個人，仲話讀碩士，唔好話係大學生吖，十幾歲o靚仔o靚妹都有「驗孕即知」呢個common sense，去睇醫生或使幾廿蚊買支驗孕棒就知啦！
誰是老竇有排搞
今日我Nuts哥電話接唔停，個個問邊個係真正嘅小三，清官難審家庭事，反而我最欣賞嘅係陳曼娜嘅豪氣干雲、拍晒心口力撐Dicky嘅態度，一句到尾，非常外母撐女婿！陳曼娜出名係圈中富婆，炒樓炒到至少半億落袋，個女結婚，陳曼娜諗都唔諗，送上大拿拿700萬嫁妝，包括一架400萬法拉利，豪！婚宴當晚，老友胡楓一句「有爺生冇乸教」玩爆陳曼娜，話佢成日炒樓冇時間教仔女，陳曼娜都係笑笑口照單全收！
今次女婿Dicky被舊愛搵上門，陳曼娜撐到盡，眼尾都費事望你金小姐，廢話少講，強而有力一句：「去驗DNA啦！」反擊話唔知係咪有B嘅金小姐！呢個外母真係夠晒台型，盡顯天不怕地不怕，放馬過嚟使怕你嘅霸氣，有米又有勢！
勁還勁，呢場戲真係有排睇，金小姐萬一有咗，係咪真係去驗DNA？淨係「誰是老竇」都有排搞啦！如果金小姐繼續「閉經」，又幾時肯去驗孕呢？睇還睇，大家都要學嘢，尤其想享齊人之福嘅老友，成堆女人圍梗係過癮，但都要識得保護自己，記住，手機足以致命！要登堂入室上埋張床，唔緊要，記住「有得震冇得瞓」六個大字，閣下先請沒收或關掉女伴手機，開心完，唔好咁快瞓住，等對方瞓咗先！淨係一張床相，足以一身蟻，否則到時真係有得震冇得瞓咯！