葉念琛外賣加料 險食百潔布

不少藝人都愛光顧平民食肆，有時被店主認出，更享有免費加料。不過免費加料未必是好事，皆因藝人洪卓立試過買外賣炒蜆「附送」一隻曱甴，狄易達出外用餐更與曱甴擦身而過，相當恐怖！最近就輪到導演葉念琛「中招」。

不打算追究食肆

葉念琛近日忙於宣傳其執導電影《失戀日》，豈料他昨日叫外賣，竟被「加料」一大塊百潔布，事後他拍下罪證，並在社交網大呻：「剛剛嗌外賣，點解碟菜入面多咗塊百潔布？蝦我同樣係綠色就睇唔到！」驟眼看百潔布與青菜的顏色相近，惟該百潔布未知抹過甚麼，不慎放入口分分鐘吃下大量細菌，十分惡心。

記者聯絡葉念琛，他指未有進食外賣，可謂不幸中的大幸。為人大量的他表示不追究食肆：「一打開個餐盒就發現塊百潔布，所以我冇食到，相信都係間舖無心之失，自己唔打算開名追究，多謝大家關心。」問到會否再光顧該食店？他僅以一個滴汗兼苦笑的公仔圖案作回覆，看來見過鬼怕黑。

葉念琛的外賣「附送」百潔布。

莊思敏坦言不會致電安慰葉念琛。

莊思敏忍唔住笑

曾與葉念琛傳緋聞的莊思敏坦言見到相片忍不住笑，但未有致電慰問對方：「佢又冇食到，又冇食物中毒，唔使安慰。」有經營食肆的她認為餐廳衞生非常重要：「我哋對廚房員工嘅要求好嚴格，我相信呢件事真係萬中無一，因為一般洗碗同外賣盒、食物唔會擺喺好接近嘅地方，真係得啖笑，希望唔好再有同樣事情發生。」

文：專案組