小三當道！婚前驗「心」令你放心

再講近啲，有羽毛球壇神鵰俠侶之稱嘅林丹同謝杏芳，本來啱啱生咗個B，組織三人新世界，但係林丹喺最後防線崩潰，敗喺內地女模趙雅淇34C雙峰上（可能係「雙峰中」！）之後呢位小三更走出嚟聲淚俱下道歉，雖然口水鼻涕出晒嚟，但係話晒係「超級丹」個小三喎，淨係呢個朵，已經震撼13億人啦！話時話，依家科技太發達，一部手機一個APPS，只要Chat幾句，再Send張性感相，一段關係就好輕易咁展開，小三亦都因為咁成行成市。

啱啱做咗外母嘅陳曼娜，佢女婿Dicky結婚兩日啫，就被人發現佢同個「小三」金小姐當街糾纏。成件事最奇怪，係陳曼娜個女同女婿都唔係藝人，點解會有內地媒體專登飛嚟香港跟蹤？而呢位金小姐一哭二鬧爭在未上吊，點解全程咁啱喺大街大巷發生，又咁啱畀記者影到？唔通正如陳曼娜話齋，成件事都係陰謀？話時話，其實邊個係小三都冇人知！金小姐以為自己係正印，點解愛人結婚了，新娘不是我？但陳曼娜個女又以為婚都結埋仲唔係正印？究竟邊個係小三？真係只有Dicky先知！

每對新人喺結婚前向來都會被建議進行驗身，計我話，婚前驗「心」，令你放心！雖然陳曼娜個女同金小姐邊個係小三，就算搵包青天或褔爾摩斯出嚟都搞唔掂，但如果婚前搵私家偵探做「貞」探，起清另一半個底，睇清楚個未來老公係咪成日被女圍嘅花心蘿蔔，驗清驗楚，最後攞番張正印鐳射標籤證書，冇手尾跟，先至結婚，咁就至安心！尤其依家小三成行成市，根本連你自己都唔知係咪小三時，搵人起起底，對自己都有個保障，唔使將來有乜事，就笑大人個口啦！依家百業蕭條，搞番個驗心私家「貞」探社，只要請班人識行識走，唔理男女好醜，阿婆又得阿叔又得，真係十八歲到八十歲都可以做「貞」探跟蹤偷拍，分分鐘大大拉低失業率之餘，做得有聲有色，仲可以上埋市！