陳曼娜女婿結婚兩日驚爆婚外情

陳曼娜愛女鄭祖兒本月22日與任職金融界的男友蔡朝旭結婚，並於灣仔舉行大型婚宴，婚宴當晚有不少藝人出席，場面熱鬧，心情大靚的陳曼娜更畀女婿「101分」！

萬料不到，這位爆分女婿在婚宴後不足一星期，即被內地網站全明星探爆料，指婚前有一內地大學生情人，兩人更於婚宴後兩日在香港灣仔見面，期間態度親熱猶如情侶，既搭膊又攬腰！當日，Dicky與該女大學生同穿黑色衫褲先從豪宅步出，然後結伴前往銀行，期間女方緊緊地翹着Dicky的臂彎，搭扶手電梯上落時，Dicky更與女方攬頭又攬腰，十足情侶般親密。

聲稱中招

兩人抵達銀行後，在櫃台前似處理一些文件事項，不知何故，女方突然變得情緒激動，還欲搶職員手上的文件，火藥味十足，其後兩人黑口黑面離開，期間一度爭執，該名女子情緒激動爆喊，兩人鬧到火紅火綠，曾露出憤怒眼神的Dicky一度拍她的腰及拉對方手臂作安撫，之後，女方情緒稍為平復，但未幾又再爭執，女方再度痛哭！而Dicky最後沒有理會自行離去，該女子亦坐的士離開，雙方不歡而散。

昨日Dicky接受本報電話訪問時稱：「我肯定自己中咗招！好多謝大家關心，件事依家處理中，好多資料整理緊，我一家要喺適當時候出嚟，好坦誠同詳細咁交代成件事。」問到對於太太及外母之影響？Dicky再強調：「我當然好關心對佢哋嘅影響同感受，佢哋好明白我，因為佢哋好清楚成件事，所以我有必要整理好一切之後，好坦誠咁交代所有嘢！」

威脅爆料

據知，該女子姓金，在大陸居住，最近才遷居來港，與Dicky曾經有過一段情，但年前已分手，有人還對舊情戀戀不捨，雙方關係糾纏不休，並時有聯絡，當知道Dicky結婚消息後，變得崩潰失控，之後，有人曾透過WhatsApp大數男方負心與不是，並提出一些要求，指若對方不答允便會「爆大鑊」，令他的屋企人受到影響，故Dicky才無奈地在婚宴後兩日與女大學生見面「攤牌」，希望解決事件，估不到被傳媒目擊全程，令事件極速曝光！

文：影視組