梁小冰轟慈禧上身：唔道歉就退會
46歲的梁小冰與50歲陳法蓉兩位前港姐加埋近百歲，昨日出席慧妍雅集活動卻吵大鑊，小冰不滿被陳法蓉當眾訓斥沒穿大會制服，嬲爆斥陳法蓉沒有禮貌，場面火爆，不過陳法蓉堅稱沒有鬧交，二人各執一詞。怒氣未消的小冰回家爆喊，再踢爆於後台第二次鬧交，直指陳法蓉雙面人，趾高氣揚，慈禧太后上身，揚言陳法蓉不道歉就退會，火藥味甚濃。
藝人梁小冰、陳法蓉、王愛倫及名譽顧問陳紫蓮等昨日出席慧妍雅集活動，成員均統一穿上大會粉紅色外套，小冰因沒穿而被前慧妍主席陳法蓉當眾訓斥，點起火頭。小冰嬲爆說：「佢（陳法蓉）比較直腸直肚，我烈女性格，佢話我唔着制服（外套），我件外套擺咗喺車度，佢兜口兜面話我，好唔識大體。」又謂自己從未得知要穿整套制服，並稱身上的短袖衫亦是大會制服，怒指對方大庭廣眾訓斥她是非常沒禮貌：「佢應該要有禮貌咁講，幾熟嘅朋友都要保持禮貌，所以我直頭拒絕合照，亦唔需要合照，呢個係我烈女性格，佢好冇禮貌。（要求佢道歉？）要o架，我會私下打電話畀佢溝通，任何一個會員都要以禮相待，應拉埋一邊講。」又叫大家看看她有幾（興）：「我係好易被撻着，但好易冇事，氹番兩句就冇事。」她又謂與陳法蓉十多年來很少見面，問到是否覺得對方像訓導主任？她說：「我唔覺得佢係，邊個畀權佢？大家都係會員。」
拒絕再出活動
對於小冰的控訴，陳法蓉哈哈大笑說：「呢個係佢個人感受，我唔否定，我有同工作人員講咗制服上身要一樣，我後來有問番啲員工係咪漏咗通知人。（佢話你訓斥佢？）我冇訓斥過任何人。（佢話你冇禮貌！）咁叫佢一齊入嚟一齊講。」到活動尾聲，王愛倫上前搭梁小冰膊頭及掃背安撫她，小冰稱以後都不出席這些活動，然後一支箭衝上老公的座駕離開。
小冰回家後仍未息怒，透過電話回覆本報表示回家後更覺得受盡委屈而爆喊，小冰說：「佢一見到我招呼都冇打，就衝埋我度話做乜唔着制服，黑面兼當眾鬧我，我未回應，佢已經行咗去。」小冰更直言：「咩事咁權威，但我當時都忍住度氣，做晒儀式，照埋大合照，但我都落唔到啖氣。你冇畀面我，冇禮貌，你咩職位，如果同我一樣係普通會員，你憑咩態度鬧我。」
點解會假到咁
原來當記者與小冰及陳法蓉做完訪問後，小冰稱在後台再被陳法蓉衝埋身再鬧第二次，她指陳法蓉對她說：「你咁小件事，搞到咁大件事。」小冰指當時沒有退讓，並反擊謂：「你唔好恰我恰到上心口，你要檢討吓你依家嘅態度，你依家好冇禮貌，使唔使要做到咁樣？我畀機會你同我道歉，你唔同我道歉嘅話，我就退出慧妍！」小冰指當時陳法蓉即發難，並謂：「我依家就同你出去，三口六面同記者講清楚。」
小冰指就在該個時候，Rosa（陳紫蓮）跟王愛倫將二人分開，叫小冰消氣，王愛倫更表示：「陳法蓉不嬲都係咁，可能高山反應啦，唔知個腦係咪有事。」小冰繼續激動謂：「咁都得呀？如果佢有病，我會畀機會佢道歉，估唔到我咁唔受尊重，我好hurt！返到屋企喊咗幾次，係咪我太善良畀人恰？對我就兜口兜面鬧我，對嘉賓笑騎騎，佢係雙面人，OMG！點解可以假到咁？我入行30幾年，我唔係知名度高，唔係德高望重，我咁多年對人都客客氣氣，係我做人宗旨。好失望，佢好唔值得原諒，我隨時接受道歉，唔好當笑騎騎當講錯、當冇事，我唔可以陪佢演呢場戲。」
斥無憐憫之心
她又謂自己恩怨分明，對事不對人：「平時佢點對人我有眼睇，但對我咁樣就唔可以接受，當年係佢請我加入慧妍雅集，依家佢趾高氣揚，慈禧太后上身，識我嘅朋友都知我唔係搞事。」小冰亦補充：「我唔要任何人撐我，呢件事上我理直氣壯，如果佢夠勇氣同我道歉，我即刻接受！」及後她在微博繼續怒鬧。
陳法蓉晚上在微博發文，表示慶幸當時有名譽顧問Rosa和其他工作人員在場，可以證明她沒有斥責或不禮貌對待任何人，對於這些不實的指控，感到莫名其妙。對於陳法蓉以哈哈的回應小冰的激動，小冰斥陳法蓉毫無憐憫之心，只會龜縮。
梁小冰
年齡：46歲
銜頭：1990年港姐季軍
感情狀況：丈夫陳嘉輝
代表作：獲封「古裝皇后」
陳法蓉
年齡：50歲
銜頭：1989年港姐冠軍
感情狀況：未婚
代表作：《賭俠》演龍九出位
文：名人組