沈卓盈過大海騰雞（目及）仔
女星沈卓盈、周秀娜及薛凱琪等昨日齊齊「過大海」，出席年度盛事澳門賽車。面對現場一眾型仔賽車手，單身的沈卓盈自言怕醜不敢集郵，卻不時（目及）仔大飽眼福。至於周秀娜打扮密實，似乎有心「讓賽」，不欲搶去賽車女郎的風頭！
年度盛事澳門賽車昨日揭開序幕，一眾圈中人包括沈卓盈、周秀娜、莫文蔚、周柏豪及沈震軒等專程過江捧場，靚人型車同場，氣氛熾熱！單身的沈卓盈笑言不敢與賽車手合照：「我怕醜呀！加上現場好多人，根本影唔切。之前已經試過喺上海睇賽車，其實未入到場已經聽到汽車引擎聲，愈行近賽道，個心就離一離，好緊張！我覺得賽車手要好有膽識，仲要靠技術同運氣，我都好鍾意呢種尋求速度快感嘅比賽。我喺現場見到好多賽車女郎，真係好性感、好靚！」
Bob「隊冧」松岡李那
至於去年有份出賽的周秀娜密實上陣，以高貴造型亮相，坦言今年心情截然不同：「上年有份參加明星賽，用咗個幾月時間做準備，一聽到引擎聲就好敏感，估唔到今年換身份，可以着靚靚做頒獎嘉賓！頒獎畀車手嘅時候，我好明白佢哋個獎得來不易，真係感同身受。如果出年再搞明星賽，我都有興趣報名參加。」同場的朱晨麗則目睹有車着火，她大呼緊張：「最好有機會試吓坐喺賽車手隔籬，Feel吓有幾刺激。」
而林盛斌（Bob）今年是第二年親身到場觀賞賽事，坦言感覺刺激：「能夠同啲賽車手、賽車作近距離接觸，點睇都值得高興啦！我同陳慧敏仲膽粗粗走咗落條賽道度擺甫士影相，影影吓後面有工作人員突然大叫要我哋快啲走開，原來啲賽車嚟到，準備排位！」他又笑言獲安排與其他嘉賓到貴賓室休息：「傾吓偈又有酒飲，我哋就係咁隊冧咗松岡李那，估唔到睇賽事都要變飲醉酒！」
文：影視組