SG空虛失眠遲到要搵仔慰藉
組合Super Girls（SG）日前完成一場九展演唱會，休息四日後昨日火速投入工作出席活動，SG卻「騷後後遺症」病發，搞到遲大到，還大呻空虛、失眠、發噩夢兼食欲不振，成員Cheronna笑指要搵仔慰藉。
Super Girls於光棍節舉行演唱會後，昨日又合體出席活動，身為活動大使的她們卻遲大到，成員Cheronna解釋說：「係服裝上有啲誤會，我哋本身襯嘅鞋同衫冇預有大會服裝。」Yanny則透露因為經理人四出為她們買鞋而搞到遲到。雖然曳曳遲到，Cheronna現場示範划艇時，仍獲半百歌迷打氣。
溝通上誤會
由於SG不止一次出席活動遲到，被問到是否懂得「尊重」兩字？Cheronna說：「相信人要學識尊重，如果佢哋求其畀啲衫我哋，亂咁着出嚟就係我哋唔尊重囉。」知衰的Yanny說：「準時係好重要，希望以後喺事前溝通好啲，唔再有呢啲情況發生。」問到會否叫公司日後與大會溝通得好一點？隊長Aka即認錯說：「一直溝通得好好，可能我哋演唱會啱啱完咗有太多嘢，一時間溝通上有少少誤會，我哋都覺得唔好意思，無論點都好，遲到都係我哋唔啱，下次會預早啲，遇到突發事情都可以處理。」
每日發噩夢
至於前日牛一的Jessica透露與家人食飯慶祝，問到有否心儀的男士送花？她笑笑口說：「冇呀，只有演唱會歌迷送花，諗住個唱後擺脫單身添。」剛完成個唱的SG直言患騷後後遺症，Cheronna說：「每日發夢都係排緊舞，同埋好空虛。（出去識男仔？）有仔畀我溝一定溝，但冇呢！」Jessica則表示失眠多日，Aka就因太亢奮搞到冇胃口，反而Yanny報喜說：「我食到同肥番，之前唔可以食熱氣嘢，我依家就瘋狂咁食。」
文、攝：音樂組