阿倫嗌冇飛！溫拿耍太極

太極及溫拿合體開騷，勢必掀起撲飛潮！

溫拿與太極樂隊將於明年1月7日假亞洲國際博覽館舉行《純音樂LIVE》音樂會，門票今日公開發售。他們昨日舉行記者會，撐拐杖現身的譚詠麟（校長）笑言終於可用到亡父的龍頭拐杖，他透露日前在泰州踢球賽時被傷及右腳：「隻腳一受力就好似雞蛋咁脹開，我睇咗（醫生）、敷咗藥之後收得幾好。」又指將到新加坡開騷，所以要全速康復。談及音樂會的名稱，校長踢爆彭健新曾將音樂會改名為「溫拿耍太極」。

• 阿倫踢波不慎傷到腳，出席活動時要撐拐杖。

太極霸位唱耐啲

對於有機會與前輩溫拿一起開騷，太極表示非常興奮，但坦言想霸佔多些演出時間：「計年紀我哋應該彈多啲嘅，佢哋應該休息多啲。我哋多一個人，總歲數應該差唔多，每隊300幾歲，加埋有600幾歲！」由於是次演出只此一場，太極坦言未夠喉，又大呻門票必定會被溫拿的粉絲掃清：「我哋啲Fans都冇得買，身邊啲朋友都搵我哋買飛，但佢哋想去睇溫拿，睇吓溫拿點耍太極！」校長亦笑言相信門票開售就會即日宣布售罄：「圍內個個都話要睇，已經搶得好勁！（孭好多飛債？）內部應該冇晒。」鍾鎮濤則透露已有不少人邀請他們與太極一同出埠演出。

文、攝：音樂組