蘇志威（阿細）開業已四至五年的LUXE品牌禮服店，與志偉代言的服裝店及孫耀威的新店同處一條街，昨日阿細在電話中被問到有競爭對手出現，他大方說：「幾好呀，帶起整個市場，個餅愈嚟愈大，我未做時，冇人做（口架），正如草蜢當年咁，邊有組合，但有咗草蜢，組合多到成行成市。」
阿細信心爆棚不怕被搶生意，自信他的品牌質素高且獨一無二：「最緊要做好自己，我個品牌係講質素。（係咪穩坐禮服龍頭大哥之位？）都可以咁講。（禮服收咩價錢？）由最平六千到幾百萬都有，只有最平冇最貴，你畀得起錢，二萬幾蚊一個24K金線煲呔我都做到畀你，如想要全刺繡服裝，我有內地高級訂製設計師郭培老師助陣，價錢大約幾百萬，幾貴都有。」
問有何成功經商之道？他說：「貨真價實，否則我個品牌生意額唔會每年雙位數字遞增啦，識貨嘅人係唔會覺得貴，係覺得抵。」