夠料拍《溏心風暴》！
全城巴打絲打討論劉鑾雄公開同舊愛呂麗君宣布割席呢單新聞，真係一地花生。分手咪分手囉，仲要講晒出嚟，為乜呢？雖然大家當睇戲咁睇，仲話無綫可以就地取材拍新一輯《溏心風暴》，但話晒都係家醜，竟然有人唔介意揭開肚皮，畀天下人討論，有戲睇喎！我梗睇o架！
日日新鮮日日甘，奇就奇在寫畀共枕多年嘅「老公」嘅訊息，無端端會公諸於世！訊息中「老公」前「老公」後，話只要「老公」將不滿呻晒出嚟，唔好屈埋屈埋收喺心就好，又話只要「老公」開心，為咗「老公」乜都會改！成篇文字字有淚，卑躬屈膝，真係睇完都要講句「可憐天下父母心」！試問有邊個父母會忍心見到自己個女，搞成咁？女方畀人講、畀人討論，但見到一對仔女仲細，都係想有爸爸嘅愛錫兼想家庭和睦，點知轉個頭畀人公開，再次引起全城話題同指點，真係苦過Dee Dee！
今日我出去食個Brunch同啲老友吹開水，啲老友話我尋日寫得啱，公開家事喎，真係徐小鳳都要唱句：「何必呢！」老友記同埋好多網民都拍晒大髀話，使乜搞到咁，同時又話女方都算夠大方！老實講句，個女見到自己都唔叫聲「老竇」，其實小朋友真係好純真，見到邊個對阿媽好，咪識笑又識叫囉！