趙學而處女騷發台瘟唱歌過三關
出道22年的歌手趙學而前晚舉行處女個唱，在Star Hall展開一連兩場《我趙學而演唱會》。她在台上頻頻蝦碌，唱同一首歌兩度發台瘟眼濕濕，唱到別人的歌曲時更失控爆喊，連她亦自嘲外表兇狠，實則是一名「喊包」。
趙學而苦等多年終於開騷，前晚舉行首場個唱，吸引不少圈中人捧場，包括好友阮兆祥與女友、廖碧兒、上山詩鈉、蒙嘉慧、前飛圖唱片公司老闆、葉玉卿哥哥葉志銘，當中鄧兆尊帶同兩個女友睇騷，陳奕迅和老婆徐濠縈則姍姍來遲，學而的緋聞舊愛謝霆鋒雖然未有捧場，但有送上花籃祝賀。學而以日式和風造型登場連唱幾首慢歌，唱到《難懂》時不慎被口水濁到，她即自嘲：「呢啲真係叫『自濁』喇！」
「一世好似活咗七世咁」
學而其後在兩位鋼琴師的四手聯彈伴奏下唱出《輸給戀愛的女人》，唱了頭段卻突然「入唔到」第二段，她即嗌停要求重唱，笑言年紀大冇記性，但重唱依然在同一個位出事，她尷尬地說：「我真係黐黐哋o架！發台瘟！」結果唱第三次才順利「過關」，獲全場觀眾拍掌支持，學而隨即眼濕濕說：「唔好咁快搞喊我！」
學而演唱方皓玟作品《你是你本身的傳奇》時終於失控爆喊，她強忍淚水說：「每一次，係每一次我唱呢首歌都喊，聽到首歌嘅Intro我就想喊，唔知點解！今次演唱會叫『我趙學而演唱會』，係每個人嘅故事拼湊而成，人生經歷高低起跌，我一世就好似活咗七世咁，啲人成日覺得我好惡、好煩，其實我好易喊，係喊包，不過大家都覺得我好兇狠。」
踢拖Encore
Encore時，學而踢拖出場，多名歌迷走到台前送花，氹得她笑說：「真係好耐冇經歷過，好似我嗰個年代咁，即係我做女嗰時。」她之後唱出《其實怕選擇》及《尋開心》為演唱會畫上句號，望到台下歌迷亮起手機燈變成一片星海時，她再度感動落淚：「好衰o架，你哋係要開大燈畀我睇！」
文：音樂組
攝：秦健輝