Super Girls箝粉絲 肉罷不能
組合Super Girls前晚開騷大玩透視、開胸裝、黑絲誘惑，並在三千人前除衫兼與赤裸肌男埋身肉搏互摸兼趷籮，辣(興)全場，成員Heidi單挑獲邀上台的男歌迷，背向對方狂扭屁股又正面腿張開，火辣程度直飆，難怪對方硬晒軚掩嘴偷笑，五女承認為個唱豁出去。
組合Super Girls（SG）前晚於九展舉行一場「Shine On Live 2016」演唱會，吸引陳瀅、何雁詩、賴慰玲、伍允龍、麥子樂、JW及王宗堯等捧場，而SG隊長Aka的緋聞男友吳業坤大方現身，但開騷不久消失於嘉賓席，原來刻意坐後排避免搶風頭。騷上，SG施展渾身解數各騷Quali，分別以Bra Top、高衩熱褲及黑絲登場，大騷長腿及黑絲誘惑，又與半裸肌男跳辣身舞，互摸、自摸、扭籮、趷Pat、腿張開等誘人舞姿樣樣齊，場面火辣，之後五女興奮大叫：「我哋係Super Girls，能夠行到嚟呢度，響咗自己朵先。」
SG全晚換上多套性感舞衣，期間一名男觀眾獲邀上台，穿大褸襯熱褲的SG伸手摸男觀眾兼一字排開，並當眾解開大褸露出Bra Top，當她們行到台前獻唱時，五名肌男合力將男觀眾抬到前方，五女再圍住他轉圈，最後Heidi挑逗對方，將男觀眾雙腿擘開，再背住他扭籮，最後轉身雙手按住對方膊頭，再腿張開夾實對方，令男觀眾睇到硬晒軚，又口擘擘又掩嘴偷笑，同時惹來台下歌迷不斷叫囂，而Jessica與男舞蹈員跳舞時，被對方180度揈後兼擺出踢腿高難度動作。
Dry爆高呼：我哋要拍拖
沒唱片合約的SG坦言沒想過能在StarHall開唱：「真係冇諗過，五年來大家經歷同成長好多，我哋友誼同愛係唔會變，希望SG可以繼續行落去。」Heidi承認成員間曾吵架：「不過鬧完好快冇事。」各人講感受時哭成淚人慘變豬頭，Cheronna解釋揀選11月11日光棍節開騷：「成日幻想有另一半，希望過咗演唱會就告別單身，我哋要拍拖。」
由於歌衫性感，SG直言做足安全措施及穿上T-back：「我哋全身黐晒膠紙。」問Aka為何落台握手時避開吳業坤，她解釋：「我掛住同第一排握手。（你話最愛嘅人今晚喺度？）係有好多人嚟咗。」提到演出衣着及舞姿大膽，五女坦言豁了出去，Heidi被問向男觀眾腿張開擔不擔心對方動L？她說：「唔會，我哋歌迷好乖，不過見到佢係咁震，其實我都好緊張。（唔驚佢摸你？）唔會。」Yanny即笑說：「當初有諗過如果佢一摸Heidi，我哋即刻衝出去打佢。」問她們另一半有否到場？五女齊心自稱單身，Cheronna說：「我哋真係好Dry，已經係中女，就快做剩女，所以好心急。」
文：音樂組
攝：吳文聰