《星魅博》：陳慧琳 徐濠縈秋冬靚爆燈
《東網巨星》全新娛樂節目《星魅博》播出後反應熱烈，每集找來時尚界資深潮人逐一點評圈中人的穿衣配搭，並提供貼身小貼士分享潮流心得。今集再邀得本地時裝設計師鄧達智（William）就秋冬轉季新裝作評論，當中公認是美女的宋慧喬穿黑色連身裙，被William評為失手之作。至於時裝教母徐濠縈及潮媽陳慧琳，就獲讚穿出驚喜，前者分數爆燈，後者則是他在初秋見過最漂亮的香港美女！
陳慧琳 襯得精彩
「陳慧琳呢套衫着得好精彩，喺秋天我見到香港嘅靚女着得最靚係佢！雖然係背心裙，但好秋冬味道，對襪係啲蘇格蘭pattern嘅襪，加上紅色露趾涼鞋，連埋皮帶襯到絕晒，藝高人膽大！」
徐濠縈 乾淨驚喜
「唔好淨係睇徐濠縈件衫先，睇吓佢個樣，好靚，好乾淨，咁陽光嘅膚色襯住呢件露肩嘅白色上衫，非常靚，條裙個print好特別，加上對綁帶露趾嘅短boots，好有驚喜嘅一對鞋，着埋一齊分數好高！」
宋慧喬 失手腳短
「宋慧喬揀呢件衫麻麻哋，因為咁樣一件連身黑色嘅裙周圍都有，同埋對高踭鞋太高，顯得佢對腳好肥好短！」
吳千語 老氣橫秋
「吳千語呢條裙有啲老氣，呢個pattern唔啱佢，我覺得佢咁年輕靚女，可以着得更加young，件牛仔短褸係靚嘅，可以配牛仔短褲、短裙，或者係leggings咁嘅窄褲。」
