城城蒙眼片車 衝貨車底玩命！
郭富城與女星楊子姍合演電影《天亮之前》默契十足，身為該片導演兼子姍丈夫的吳中天竟安排這對「亡命鴛鴦」親身上陣拍飛車戲，嚇到太太情緒失控。據悉劇情交代城城被仇家安志杰迫令蒙眼駕車，全程只靠坐在身旁的子姍當「盲公竹」，結果城城揸車「片」過巨型貨車底，場面驚險。
談起這場玩命戲，城城說：「未試過咁瘋狂而且要一Take過，我要確保路面完全平坦，仲要肯定貨車唔會『片』甩我哋嘅車頂，車身擦過時要擦出火花，子姍真係好驚咁喊咗出嚟。」吳中天即補充：「子姍事先知道有這場戲，但不知我會怎樣拍，事後她掉淚瞪我，跟我說以後不要再拍這種東西了。」
出賭本「學表情」
城城今次飾演曾坐監的病態賭徒，於愛情及親情之間徘徊，他認為角色很富挑戰性，劇組更曾前往泰國一所重犯監獄進行實景拍攝：「有日我喺瞭望台望落去，發現裏面有幾千個罪犯，終於感覺到監獄生活係點。因為要研究賭徒嘅表情，做資料搜集時我啱啱去咗新加坡一間賭場開演唱會，就叫晒工作人員落去玩，睇吓佢哋落注表情係點，賭本梗係我貼啦，當交學費。」文：影視組
髮型：Ian Wong@Ii Salon
化妝：Terry Yu
服飾：Kenzo
場地：東來順@尖沙咀帝苑酒店