鄭中基加場欠落一身「飛債」
歌手鄭中基（Ronald）繼2006年後，將於明年1月28及29日，即大年初一及初二再踏上紅館舞台，舉行兩場紀念入行20周年的《FWD富衛 鄭中基PLAY IT AGAIN世界巡迴演唱會》。相隔十年再開騷，旋即引起一眾歌迷撲飛，日前信用卡優先訂票一開售，門票在3小時內已火速售罄！有見及此，Ronald決定加開1月27日年三十晚的一場演出，信用卡優先訂票會於今天發售。
對於大家反應熱烈，Ronald笑言欠下一身親朋戚友飛債，擔心加場都還不完：「我都好手緊，有諗過上網幫朋友撳飛，但諗到同歌迷一齊上網爭又唔忍心，希望依家加咗場可以夠分。」他又笑言將飛債推給太太余思敏：「近日朋友打畀我都講唔好意思，演唱會飛由太太全權負責，所以大家聯絡佢啦！」Ronald又預告囡囡Emma屆時將擔任嘉賓上台表演：「佢有少少音樂天分，會自己作歌仔填埋詞，而且同我一樣已經開始為演唱會揀歌，但唱咩歌要上台一刻先知。」