祖兒向師兄示愛嫌冇新意
樂壇天后容祖兒與劉浩龍拍拖以來甜蜜非常，前晚她為無綫遊戲節目玩估字遊戲時，被主持曾志偉「整蠱」，被迫公開向男友示愛，不過心情大靚的祖兒毫不介懷，玩遊戲時全情high爆，更笑謂：「冇乜新意囉！」而被指與新歡於街頭玩自拍的麥明詩，否認戀情之餘並謂：「咁食餐飯咪會大肚？」
容祖兒、麥明詩、郭晉安、朱晨麗等前晚為無綫遊戲節目《我愛香港》錄影，首次任該節目嘉賓的祖兒，代表灣仔區出戰，為玩遊戲更以戰鬥格造型出現。祖兒坦言早於十八歲時已在該區蒲，當時拍拖也經常於該區閒逛。
於估字環節中，祖兒背着螢光幕，並戴上耳筒猜洪卓立所說的文字，主持曾志偉於事前已向祖兒打定底：「最簡單係呢句，你只要講出心聲就得！」未幾螢光幕便打出「師父師叔師兄，我鍾意師兄多啲囉」，明顯將她與「師兄」劉浩龍戀情擺上枱，不過蒙在鼓裏的祖兒卻絞盡腦汁，邊估邊吞口水、企身兼踢晒腳，狀甚緊張，幸好未幾便猜中，令她興奮得手舞足蹈。事後被問到會否介意戀情被擺上枱？祖兒卻笑謂：「黐線啦！冇乜新意囉！」
麥明詩內疚累朋友
對於愛車連撞兩次，麥明詩無奈地說：「人類總會重複犯錯，呢排係攰啲，我知點解啦，有啲嘢開齋後就冇咁緊張，依家嗰邊花咗都未整。（會唔會叫林作同你惡補揸車技術？）會搵爹哋補鐘。（還番架車畀林作未？）整完第一次即刻還咗！」
而日前被指與新歡一同出席萬聖節派對，麥明詩自覺連累了朋友，沒料一張自拍照便成了新聞，更謂：「咁食餐飯咪會大肚？（咁有冇食飯？）係一大班大學同學，每年傳統喺十月最後一個星期五或六，都會約埋一齊慶祝萬聖節同慶祝一個同學生日，咁係有食飯嘅。」
文：影視組