吳啟華陶大宇往事如煙
吳啟華、陶大宇和宣萱，在公在私都是好拍檔、好朋友，堪稱為「黃金組合」，三人最近為新劇《隱世者們》頻密宣傳而變得關係更密切，日前一起出來做訪問，話題由回憶拍《隱》劇時的苦與樂，到慨嘆面對4K劇科技的又愛又恨，當中啟華因為經歷過辛苦到死的病痛而戒煙，就連遺囑也寫定，冷靜的宣萱則說：「養生才最重要！」
吳：吳啟華 陶：陶大宇 宣：宣萱
辛苦到 想立遺囑
吳：我後生好懶，唔會做運動，不過，依家就要啦……因為我做多咗醫生節目，了解成年人每日做運動要有半小時才健康。我之前為健康，曾經兩次戒煙，第一次意志不夠堅定，拍戲需要就食番！
陶：我一次搞掂，因為一次感冒，病到食唔到煙，成個月冇食焗住戒，當時心諗，唔趁呢次戒的話就食一世了，所以下決心，一次成功，都算奇迹。戒咗煙後，真係面色好咗好多，對我嚟講係一份好大嘅禮物。
吳：通常戒煙都係因病而戒，大宇，你就好啦，只係感冒一次就搞掂！我嗰次辛苦到遺囑都寫定！當時我同宣萱喺上海拍戲，天氣好凍我又鼻敏感，不停流鼻涕，有一晚連鼻血都出埋，我心諗一定係大單嘢！
宣：吓！咁大件事我都唔知嘅，好以好衰女咁！其實我都有兩次食煙經驗，第一次只得六歲，阿媽知我唔鍾意，畀支煙我試，教我吸入去肺度，嘩！嗰吓我真係覺得個腦都痛；第二次就係我十八歲失戀，但當時我真係食極都食唔到（煙），因為個反應太辛苦。
有運動 跌低冇壞
為了健康，啟華和宣萱密密講如何做Gym和玩跑步機，氣來氣喘目的是多做帶氧運動，旁邊大宇就施施然話行山聞樹「吸氧」最直接又精神爽利。
吳：要健康，成年人每日最少做半小時帶氧運動，做做吓上癮添，如果唔做會有罪惡感！
宣：啟華好犀利，拍劇放飯都話要返屋企做一陣運動。
吳：你都好忙吖……
宣：一星期兩至三次，唔係為減肥，係想鍛煉肌肉唔好向下，出街行路時，跌親都冇咁傷！
陶：嘩！你依家要開始擔心會跌親，哈哈……
吳：試過一次拍劇成地粉，個鏡頭拍我哋打，我單腳撐住後，成個人撻落地，背脊落先，仲有個人壓落我度，如果我冇運動開一定入廠（醫院），撻完我起番身，竟然冇事，運動係有效。
陶：講到帶氧運動，我都有行山，嗰種大自然感覺好正，好鍾意聞樹味，好醒神！如果夏天我會鍾意游水，不過我怕曬出雀斑，我會用毛巾包住自己塊面囉！哈哈，唔好怪我異相，隨時焗死！
約定明年 單車Trip
運動為三人帶來好體格和好面色，但歲月痕迹始終不敵新興的4K拍攝，宣萱坦言驚青，不敢在面上做外來物質（Botox），惟有勤力做機緊緻面容，旁邊的啟華則說：「女人唔生會易啲Keep。」
宣：面對4K，都死o架！所以要勤力做機緊緻塊面，依家拍4K，見啲工作人員幫我打燈明顯要執耐啲！依家啲鏡頭太銳利，惟有頻頻做機，我只敢做正常嘢！最近經常做HIFU（超聲刀）緊緻啲，可以last幾個月！其實都覺自己好彩，職業關係要keep，我都有啲女朋友結婚後就唔keep，突然變咗個肥婆，我做男人都想拖出嚟個老婆靚啲啦！
吳：女人唔生仔易Keep好多…
宣：我生完的話，可以退休！
陶：點可以畀自己停，去旅行囉！啟華好鍾意熱鬧，之前都有搵我哋去，我見佢一拖三去沖繩（前妻石洋子、趙碩之和周美欣）好開心！
吳：係呀！單車遊好玩，可以explore個城市，沿途可以停吓睇風景，好過癮！我出Trip帶埋架摺車落篋就可以啦！我再搞囉……你哋幾時得？
宣：出年！
後記
啟華發起單車之旅，大宇也顯得躍躍欲試，只是不知如何在旅程中安置一部體積不小的單車，不過經驗豐富的啟華，拍心口一力搞掂，宣萱也信得過有華哥冇奔波，看來這次養生之旅，明年是事在必行了。
場地：THE STADIUM
吳啟華化妝：Kidd Sun
攝影：劉斌