真命天女未出世？展鵬提親嚇窒唯唯
胡定欣與陳展鵬「撻着」後首次同場接受訪問，之前拍拖去歎糖水，定欣昨日「嗒糖」指日後再食都不會避忌，更大方搭實展鵬膊頭；而展鵬被問到「真命天女」時，竟借梁烈唯未出世的女兒來過橋，當場嚇窒唯唯。
昨日胡定欣、陳展鵬及梁烈唯齊齊於西貢為無綫劇集《同盟》拍攝，今次是定欣、展鵬「撻着」後首次同場做訪問。拍攝期間，二人毫不避嫌，定欣更風騷搭住展鵬膊頭。提到之前定欣受傷，問展鵬有否好好照顧她？展鵬笑說：「佢係見到我、唯唯同歐瑞偉暈晒大浪先拗柴！」再提到之前單立文指他與定欣是「姣婆遇着脂粉客」，展鵬坦言沒有嬲：「佢個人好gag、同佢好friend，不過單立文唔係咁了解我囉！」問到有相士批他的「真命天女」已出現兩年？展鵬即借唯唯未出世的女兒過橋：「定欣都唔只兩年啦！係咪講唯唯個女？」嚇到唯唯即說：「吓！我淨係畀過張4D相你睇咋喎！」相當搞笑。
照舊嗒糖
定欣受訪表示與展鵬一齊開工不感尷尬，說到二人甜蜜歎糖水，她指當日並非單獨約會，還有其他人在場，定欣甜笑說：「日後食糖水都唔會避忌，因為冇嘢需要避忌！」說到單立文指她「姣婆」，她說：「我冇嬲！佢係我老竇，唔敢鬧佢，不過佢已經好畀面，平時佢私下叫我哋嘅更加出唔到街。（佢心急想你拍拖？）冇得急，總有自己緣分。」
提到停牌一事，她自言大頭蝦以致停牌半年，問會否找展鵬做御用柴可夫？她得戚說：「我有好多司機，有『將軍澳福利會』成員單立文夫婦、陳山聰、袁偉豪輪住車我。」
文：影視組