LMF粗口橫飛觀眾掟樽傷人
饒舌搖滾樂隊LMF前晚於九展舉行兩場演唱會的頭場，獲關楚耀、何佩瑜、林保怡、周家怡等捧場。LMF唱出多首歌曲，期間更叫現場觀眾齊舉中指，到中段，鄭中基上台Rap歌助陣，之後他用電影角色暴龍哥的口脗說：「見到你哋好開心，因為你哋X唔起都X咗十幾年，X出個水準來，我喺度希望大家一齊X出個未來！」接着黃貫中出場，令全場high爆。
期間MC仁同阿傑突然叫停音樂，在台上指有觀眾掟玻璃樽，更爆粗鬧搞事者：「有人掟玻璃樽，搞到個女仔受傷上咗白車，好X好玩呀？係咪想cut show呀？呢件事唔可以再發生！」大會公關其後證實有觀眾掟玻璃樽，令一名女子受輕傷，乘救護車到醫院，警察亦有到場了解，不過無礙演唱會進行。
「搖滾樂係丟bra」
到encore部分，LMF跟李璨琛出場，他笑言：「你哋畀啲反應好冇？我四年未X唱過歌喇！」而完場後，就見到現場遺下大量煙頭及玻璃酒瓶。
受訪時，LMF直斥掟玻璃樽是自私的行為，MC仁就搞笑指：「搖滾樂係丟bra，唔係丟呢啲！」至於問到可有邀請老友陳子聰來睇騷，阿肥就話：「佢唔使請，要嚟就嚟，要唔嚟就唔嚟。」