Bella Thorne揭瘡疤喪父靠接濟

Bella曾在訪問中自爆以前有暗瘡問題，後來她幾經辛苦之下戰勝，據她所講全因為家姐教她用「念力」搞掂，Bella說：「實在好難畀人意見點樣去戰勝暗瘡，我記得當我有暗瘡問題嘅時候，我家姐就會叫我去愛上粒暗瘡，之後粒暗瘡就會消失！佢話如果你愈憎恨你面上嘅暗瘡，只會令情況愈來愈惡化。」而她亦指自己平常大部分時間都唔化妝外出，就算有暗瘡及暗瘡印都懶得去遮。

教化妝護膚

雖然Bella話好難畀大家貼士點樣令面上的「痘痘」敗走，但就分享護膚心得，她透露早晚會洗面兩次，因只洗一次不能洗走所有污垢。平時在YouTube有頻道教fans美容化妝的Bella表示，就算平時拍戲拍劇現場有化妝師提供，她都必定會自行打粉底及在眼底搽遮瑕膏，然後才等化妝師自由發揮。而Bella在訪問中亦大爆前男友視星Gregg Sulkin不擔心儀容，從來不鍾意洗面，但生暗瘡會搵她用化妝品遮掩。

不隱瞞身世

來自窮家庭的Bella，父親在她九歲時因電單車意外喪生，一家要靠福利署的食物券來維生，她表示不會隱瞞身世，亦不因為捱窮而感尷尬，反而會因冇錢而逼自己努力工作。

自細已是模特兒的Bella入行多年，她在訪問中自爆遇過好衰的富二代女星：「佢為人衰得好緊要，我會用一切辦法遠離佢，我亦從來冇同佢打招呼，佢嘅家人唔似佢咁衰，因為佢自細已係億萬富豪，由細到大都唔需要去工作。」雖然Bella玩「揞名爆」，但有傳媒就為她縮窄範圍，指Miley Cyrus、Kardashian姊妹及妮歌娜佩絲（Nicola Peltz）都有嫌疑！

甩拖搵家姐療傷

Bella有兩名家姐Kaili、Danielle及一個哥哥Remy，全都是演員，二家姐Danielle與她一樣是自細入行，四歲已成為B模。在三位哥哥姐姐中，Bella與Danielle的感情最好，時常孖住周圍玩，並不時上載火辣辣的泳衣照上網引宅男。

上月Bella宣布與男友Gregg分手後，就第一時間搵家姐Danielle安慰，Danielle陪妹妹外出散心，事後Bella就上載兩張與家姐在街上玩到癲的照片，並留言指Danielle燃亮她的生命，更指若沒有家姐的話，她的世界會變得黑暗，確實姊妹情深！

文：外娛組