Yumiko意外，加深母女情

童年，要盡情享樂

去年4月，Yumiko為老公梁學儲誕下寶貝女「梁浸浸」，母愛令不愛下廚的她開始鑽研食譜，為女兒安排最舒適的生活。1歲多的梁浸浸出世至今都集萬千寵愛在一身，舉手投足都成為焦點，可愛得令蔡卓妍、鍾欣潼及容祖兒爭住抱，究竟梁浸浸曳唔曳？Yumiko自有一套教女良方。

「湊女比我想像中好好多，以前唔識Take care佢，冇耐性，但原來有啲嘢做落咗就OK，只係睇你有冇目標。我以前唔會煮餸，少買餸，依家就成日都去，諗唔同餐單同埋煮畀佢食，睇吓佢係咪鍾意，以前兩公婆都出街食，依家就只係煮畀個女食。（對個女仲好過老公？）係o架！（唔驚老公呷醋？）冇，我覺得大家反而仲融洽，仲似家人，我哋有共同目標教育個女成長。

梁浸浸咁可愛，祖兒都忍唔住錫番啖！	阿Sa都好鍾意同梁浸浸玩，你睇佢哋笑得幾開心！	Yumiko將囡囡打扮成神奇女俠，Kawaii呢！

我唔會畀佢學好多嘢，因為自己細個試過學好多嘢。我唔一定要佢成為一個點樣嘅人，反而想佢去享受，因為我覺得做小朋友係最幸福，我想佢有童年，未必畀佢學好多嘢，但會睇住佢慢慢成長，睇佢適合啲乜。（會唔會做怪獸家長？）希望自己唔係，但我對Playgroup嘅睇法有改變。我以前覺得佢同其他小朋友玩就OK，唔使去Playgroup，唔想好似好谷佢咁，但又想睇佢係點樣，究竟係恰人嗰個，定係被恰嗰個？佢上咗一堂，我發覺唔太需要擔心佢畀人恰，因為佢識主動出手保護自己，不過我又擔心佢將來又唔靚又野蠻，女大十八變，性格都要好，慢慢教啦！我鍾意佢自由發展，但太自由又唔得，希望佢識得同人分享，學識分辨是非。我贊成體罰，女仔唔使咁重，男仔就需要，有時未必係打手板，而係整個懲罰區，要佢做錯嘢就罰企，要佢知道做錯事會有懲罰，賞罰分明。

Yumiko生了梁浸浸後有不少轉變，有女萬事足。	Yumiko為美容品牌Restylane拍攝短片，大談生B後的轉變。	Yumiko錫晒梁浸浸，不時上載母女照晒溫馨。

我唔緊張揀學校，好多學校都好好，我喺邊頭佢就喺邊度返學，佢遷就家庭，唔係我哋就佢，可能會揀國際學校。我唔抗拒Local school，但我抗拒小朋友返完學仲要補習，唔明點解咁多時間返學都唔夠，仲要補習先拎到正常成績，我哋以前讀書都唔使補習，所以唔想佢用咁多時間做啲佢『要做』嘅嘢。」

梁浸浸深得婆婆歡心，亦令婆婆同媽咪多咗時間相處。	梁浸浸	鄭希怡

媽媽，被迫做衰人

梁浸浸的出現令Yumiko一家再次凝聚，有言「女兒是爸爸的上世情人」，女兒果然經常黐爸爸，當初牙牙學語亦是先學懂叫「爸爸」，Yumiko更成為家中的「衰人」。

「老公做唔到惡嗰個，我已經放棄咗，最初我以為佢得，佢都以為自己得，點知原來唔得，咁惟有我係衰人。可能就係咁，佢係叫『爸爸』先，我都冇得恨，但每個過程我都Enjoy。老公成日唔喺屋企，但囡囡一見到佢就會黐住佢，我可能要等多10年佢先會係我嘅好朋友。

媽咪有時會幫手湊女，但佢唔係成日喺香港，有時香港、上海兩邊走，但梁浸浸嘅出現的確令我哋成家人凝聚咗，見得好多。媽咪都話如果唔係有梁浸浸，佢喺香港一星期已經覺得好悶，因為冇朋友同親戚喺香港，佢只係嚟探吓我，但依家佢係可以住幾個月。我好珍惜呢段時間，因為自從搬出嚟住後，我好耐冇同媽咪相處咁耐，所以幾珍惜依家Family嘅感覺。媽咪好鍾意梁浸浸，有時都驚佢太寵個女，有時啲嘢我話唔得，但我一走開婆婆又話得，所以有時佢就會走去婆婆度，黐婆婆多啲。」

放慢腳步珍惜成長點滴

為了梁浸浸，Yumiko經常留港，懷孕期間更一度暫停個人經營的時裝生意「Why So Cool」。她現時繼續自己的生意，但未有計劃再生多個小朋友，她說：「大肚暫停咗一段時間，因為我發覺大肚時着啲衫開始唔靚，所以就唔再影，有搵Model幫手影。大肚又處理唔到好多嘢，覺得要停一停，因為我要親力親為，唔想交畀人，依家就係時候繼續。依家每日只需編排佢食乜，我就可以出去，出去兩、三個鐘做完嘢就可以返去同佢玩。」

至於幕前工作，她說：「去唔番以前，一年走唔到咁多個月出去拍戲。依家呢個時間好珍貴，我可能唔生，可能得一個女，佢依家識啲又唔識啲得呢個階段，我會留港出席活動，出Trip幾日都冇問題。以前一年拍幾套戲，每套戲拍3個月，依家唔係好適合，或者等佢大啲先。依家好多計劃，做自己想發展嘅生意。」