SG索Look備戰半裸男陪跑喪(目及)
組合Super Girls近日為11月11日舉行的演唱會積極備戰，昨日五女穿上Sports Bra「戰鬥Look」跑步練氣，惹來兩名赤裸上身的「肌男」眼甘甘兼做護花使者尾隨陪跑！而近日天氣轉冷，她們坦言要好好保護身體免得「佗衰家」！
憑健康形象深受廣告商垂青的組合Super Girls（SG），將於11月11日光棍節假九展Star Hall開騷，五女為以最佳狀態示人，近月已閉關集訓，深明「台上一分鐘台下十年功」的SG昨日相約跑步練氣，由於五女分別以Sports Bra及短褲示人，即引來不少男士行「注目禮」，期間更獲兩名半裸「肌男」喪(目及)兼尾隨陪跑，可惜遭五女「派檸檬」發力狂奔，但由於用氣過度，五女跑到氣喘喘。
壓力大瞓得差
第二次舉行個唱的SG坦言壓力愈來愈大兼睡眠質素偏差，Cheronna說：「每日都學唱歌、排舞同做運動，返到屋企都好夜，上得床瞓又唔係即刻瞓得着。」Jessica坦言現階段最需要休息及保護把聲，被封「冰山美人」的Yanny感激公司送上潤喉食品，她說：「大家近排係咁飲暖水。」Cheronna亦插嘴說：「最緊要唔好病，如果唔係就佗衰家！」
問到有否為個唱鬧意見？Heidi說：「冇！反而大家畀好多意見，始終大家都想做好場騷。」而隊長Aka左膝蓋日前被耳機鈎鎅到爆缸，傷口已埋口的她說：「好得七七八八，唔會影響演出，依家都做緊物理治療。」
文：音樂組
攝：張福宏