蜜月返港陳智燊宋熙年造人Hold住

上月中於英國行禮的藝人陳智燊（Jason）與宋熙年昨日度完蜜月返港，戴上Jason設計的幾卡訂婚鑽戒及求婚鑽戒的熙年，拖住老公仔一齊推行李出閘，期間不時騷手上鑽戒，表現恩愛！Jason透露婚後啟程到威尼斯，由於行程緊密，故數日內走遍瑞士日內瓦及法國等地：「冇乜嘢買，反而係不斷食嘢，意大利海鮮好好味。（有冇造人？）大家係有計劃，但等香港同澳洲完埋個Party先，之後就嚟料，出年1、2月就去馬爾代夫曬太陽。（今次結婚咁秘密？）一直想搵戶外，本來諗住喺數碼港，但佢哋少做呢啲形式，所以最後喺英國郊區，距離市區好遠嘅地方搞，好多謝朋友唔介意坐兩個鐘頭巴士入去。」