馮盈盈學盧海鵬試咪又想爆粗？

港姐冠軍馮盈盈（Crystal）與香港先生冠軍黎振燁（Jackson），昨日在九龍灣出席「TVB fun全城熱選投票頒獎儀式」，向得獎的幸運觀眾頒贈名車。Crystal早前被揭當選前曾在網上留言爆粗，令人嘩然，昨日她受訪時先測試收音咪是否正常運作，期間突然爆出一句：「盧海鵬試咪！試咪！」記者即問她是否又想爆粗，她表示：「唔係呀！」記者笑言「盧海鵬試咪」下一句就會爆粗，她即大表驚訝：「吓！冇o架喇！冇o架喇！淨係試咪！（係咪提起粗口都驚？）又唔會驚咗佢，反而會小心啲。」

Fans係女校男生？

提到日前與師姐麥明詩拍攝節目，問到麥明詩私下可有分享心得？Crystal說：「有呀，佢畀咗好多鼓勵同支持我，又分享佢當選後都收到好多負面批評，畀人鬧『離地』。佢教我要睇開啲，做好自己，觀眾見到你進步就會更加欣賞你。（你係咪想貼地啲？）唔係想唔想，我本身就係咁貼地，哈哈！（對負面新聞睇得開？）睇得開o架！有時啲新聞用另一角度去睇都幾好笑o架，好似有報道話我中學喺學校有好多男同學Fans，但其實我係讀女校。」

將后冠放入雪櫃

她又提到近日忙於出席領獎活動，送了銀包給男友答謝他的支持，男友則請她食飯慶祝當選港姐，她笑說：「依家最期待攞到真嘅后冠，但都要諗放喺邊，依家好難搵到保險箱，可能用個蛋糕盒放喺屋企雪櫃，最危險就係最安全嘅地方！」

文：影視組