鄭國江45周年作品展阿倫 阿Lam巨星力撐
現年75歲的著名填詞人鄭國江（鄭Sir），於七十年代中後期至八十年代初與黃霑、盧國沾在詞壇鼎足而立，為紀念今年入行45年，他將於10月27日至30日假伊館舉行4場「鄭國江45周年名曲．巨星演唱會2016」，演出嘉賓陣容鼎盛，包括林子祥、譚詠麟、鍾鎮濤、汪明荃、區瑞強及張衞健（Dicky）等20多位歌手。
李思捷唱張國榮金曲
身為演出嘉賓及演唱會統籌的區瑞強（Albert）昨日接受電話訪問，他指鄭國江已年過70，相信今次演唱會是他最後一次作品展，Albert說：「今次演出嘅歌手全部都係好敬佩鄭Sir嘅好友，講真，如果林子祥、譚詠麟唔係唱佢嘅作品，點會紅咁耐？鄭Sir亦有寫過歌畀已故嘅張國榮同梅艷芳，我哋搵咗李思捷同劉雅麗唱佢哋嘅作品。至於陳百強同羅文亦唱過鄭Sir嘅歌，但唔會刻意搵歌手模仿，交由其他歌手演繹佢哋嘅名曲，同埋好難得Dicky都返嚟唱《足球小將》！」
關正傑亦曾演繹過鄭國江不少經典作，如《一點燭光》及《雪中情》等，問到可曾嘗試邀請對方？Albert說：「咁就冇，因為知佢一定唔會嚟，正如今次都請咗林利、胡渭康兩位小虎隊成員嚟唱《伴我啟航》，唯獨孫明光缺席，佢講咗唔會再唱。（美中不足？）唔會，我唔會強人所難。」問到可會加場？他指不會，亦本已加開了一場。此外，鄭國江日前獲浸會大學頒發「榮譽大學院士」，表揚他在藝術及文化的貢獻。
文：音樂組