沈穎婷減磅變虛打到缺氧
藝人沈穎婷（Winnie）與陳嘉莉（Kelly）等昨日為本周日舉行的拳擊新星賽練習，體重尚差兩公斤才達標的Winnie，表示因夜瞓令體質變差，擔心減磅成問題，更指首次比賽時曾缺氧，搞到手腳不協調，故今次會出盡全力去打。Kelly則坦言首次上場緊張過度，腦袋一片空白。
資深女藝人李影女兒沈穎婷、崔建邦前女友陳嘉莉、鍾溥敏及李依雯將參與11月舉行的《灝天金融慈善Energy Fight 2016》「星級盃」拳擊賽初賽（決賽於12月23日舉行），為激發眾女的潛力，教練先讓她們參加本周日（25日）舉行的新星賽作熱身。
未對打 先打氣
睇得又打得的四位女星昨日齊集拳館鍛煉，身形比早前清減了少許的Winnie，透露距離賽事僅餘一星期，但其體重還要減兩公斤才達標，令她大感擔心：「真係好驚，會繼續努力減。（瘦咗會體力唔夠？）都會，個樣虛啲同易病，平時做嘢又夜瞓，睡眠唔充足，所以生活節奏都好重要。」
談到今次的新星賽，眾女暫未需要對打，故屆時會互相打氣，Winnie笑謂：「畀人打都要知點輸。（上到台好兇？）睇對手啦！盡量希望出盡力，試過缺氧令到手腳唔協調，聽到但郁唔到，仲記得第一次比賽時，上到場發現地下好跣，淨係識將腳趾死咪住地下！」
陳嘉莉 腦空白
Kelly則表示上周連續開工31小時拍廣告，結果體力透支，體能亦隨之變差，有意看中醫調理身體，問到可有信心？她說：「今次第二次比賽應該會好啲，上次驚到腳震，個腦一片空白，唔知自己做緊乜，拳法都打亂晒。」
文：影視組